DILI, STLTIMORLESTE.com – Bankada Partidu Libertasaun Popular (PLP) iha Parlamentu Nasional (PN) husu AIFAESA atu kontrola produtu importadu iha loja sira, tanba produtu balu expire ona maibe loja balu kontinua faan nafatin.
Hatete Deputada Bankada PLP, Maria Angelina Sarmento iha ambitu debate Orsamentu Jeral Estadu (OJE), iha faze espesialidade iha PN, Dili Tersa (19/11/2024).
“Ai-haan sira nee tama ona iha ita nia rai laran, maibe mos ita nia kontrolu ba ai-haan sira neebe mak husi liur mai, kuandu kompanhia sira sosa direitamente husi liur laiha garantia dehan, ai-han sira nia tempu prazu nee hanesan hakerek iha nia lolon,” hatete Deputada Maria Angelina.
Tuir deputada katak, Kompanhia sira nee hatama sasan sira ho presu neebe baratu, tanba atu besik expire ona sira sosa ida baratu, dala ruma too iha dalan klaran mak sira bele troka ninia level iha Tasi klaran ka roo laran.
“Ida nee too iha neebe ita atu kontrola no sira bele muda level, se kuandu ita iha Laboratiu ita bele halo teste katak hahan nee iha nia prazu hakerek iha nia level nee ka lae. Ida nee mak dala ruma ita laiha kondisoens ba nee, entaun ami husu AIFAESA iha prioridades estabelese Laboratiu teste ai-haan sira nee, ho ida nee ita bele iha garantia ona,” dehan nia.
(alb)
