DILI, STLTIMORLESTE.com – Bankada Partidu Libertasaun Popular (PLP) iha Parlamentu Nasional (PN) husu IX Governu labele fiar aan demais ho dezenvolvimentu neebe oras nee iha, tanba iha munisipiu sira infraestrutura hanesan estrada, ponte, eletrisidade, bee moos, eskola no sentru saude kontinua aat no seidauk halo.
“Hau hakarak hateten nafatin ba governu katak, loos ita boot sira halo ona balun, maibe sei iha barak liu mak seidauk realiza. Tanba nee, ita labele fiar aan demais. Infraestrutura hanesan estrada, ponte, eletrisidade, bee moos, eskola no sentru saude mak baze importante ba dezenvolvimentu nasional,” dehan Deputada Hermengilda da Costa Laurentina liu husi plenaria Parlamentu Nasional, Dili, Tersa (03/02/2026).
Nia hatutan, se infraestrutura la diak, dezenvolvimentu ekonomiku la bele lao ho diak, servisu publiku sai fraku, no nivel moris ema nian kontinua vulneravel. Governu Timor Leste hatene ona importansia ida nee, tanba nee aloka ona orsamentu boot ba projetu infraestrutura tinan ba tinan.
“Projetu infraestrutura barak sira ami haree lao simplemente asaun fisiku neebe real, maibe serimonia lansamentu deit, depois rai mamuk, no kontinua deit ho konsolidasaun partidu iha fim de semana. Realidade mos hatudu momos katak, projetu barak neebe lansa hahu kedas 2024 too ohin loron 2026 seidauk iha ida mak hatudu progresu signifikativu, ezemplu hanesan Maubesse, Turiskai, Same Betano, Natarbora, Lospalos, Batugade Balibo,” nia dehan.
Nia akresenta liu tan katak, bankada PLP preokupa ho dezenvolvimentu neebe iha laos tanba hakarak kaer projetu sira nee, maibe hatene katak osan nee, osan povu nian. Povu presiza hatene, no povu mos presiza atu goja no kontrola prosesu ida nee.
“Ami koalia no ezije laos tanba ami hakarak kaer projetu sira nee, maibe ami hatene katak osan nee, osan povu nian. Laos osan ema ida nian, laos mosu osan membru governu nian. Povu presiza hatene, no povu mos presiza atu goja no kontrola prosesu ida nee, laos halo kontente deit ho dahur no serimonia lansamentu,” tenik nia.
Hatan ba kestaun nee, Vise Ministru Asuntu Parlamentar, Aderito Hugo da Costa hatete, kestaun infraestrutura, nee maka lansamentu ba Estrada urbana sira iha Munisipiu sira sei hahu nafatin ba oin.
“Kona-ba estrada hau horisehik esplika ona lansamentu Sesta agora ba iha estrada urbana Baukau, sei tuir mai lansamentu ba Estrada urbana iha Ainaro no Vikeke, tuir mai estrada urbana iha Lospalos, aleinde trosu trosu importante neebe hau esplika fila-fila ona,” nia dehan.
Nia dehan, Governu mos depois de rezolve estrada urbana sira iha Munisipiu bele tama ona mos ba estrada sira iha postu Administrativu sira neebe ke oras nee seidauk iha estrada diak iha sir a nia sidade Postu, tinan rua ho balun nee bele too maske la hotu mais sei tama hadia alargamentu no hadia estrada hanesan mos Dili dadaun nee.
(alb)
