DILI, STLTIMORLESTE.com – Ambulansia barak mak avaria iha Munisipiu Baukau, tanba nee husu ba Ministeriu Saude (MS) atu tau atensaun seriu ba asuntu saude, tanba asuntu saude nee liga ho ema nia vida.
Dehan Deputada Bankada Partidu Libertasaun Popular (PLP), Maria Angelina iha Parlamentu Nasional liu husi plenaria, Tersa nee (08/04/2025).
“Informasaun neebe mak ami simu iha Sentru Saude Laga neebe difikulidade ba ambulansia multifunsaun, aleinde nee kestaun ambulansia barak mak avaria iha Munisipiu Baukau, iha seluk fali mak ambulansia iha maibe kombustivel laiha, tanba nee husu ba Ministeriu Saude favor ida tau atensaun seriu ba asuntu saude nee,” katak Deputada nee.
Deputada nee akresenta, dala barak kazu sira hanesan nee pasiente sira hakarak transfere mai husi postu administrativu mai iha munisipiu atu halo tratamentu, maibe ambulansia paradu, motorista labele halo atendimentu tanba kombustivel laiha.
“Orsamentu neebe mak Parlamentu Nasional tau hodi aprova aloka duni ba kombustivel no mos manutensaun ba ambulansia sira atu nunee labele difikulta ba ita nian povu kiak sira atu bele asesu ba tratamentu saude,” dehan nia.
Iha fatin hanesan, Deputada Bankada FRETILIN, Helena Martins hatete, ambulansia laiha duni atu tula pasiente sira, ida nee fo limitasaun ba ambulansia, motorista rasik mos fo lamentasoes katak loron ida atu foti deit pasiente nain rua, labele liu, ida nee tanba dehan mina laiha.
“Kestaun saude agora nee atu dodok aat liu tiha ona ho razaun mak hanesan ohin deputada sira kestiona halo mudansa ba estrutura, fulan-fulan no semana ida nee implika tebes ba sira nia atendimentu, ba iha pasiente sira nee kestiona tebes,” afirma Deputada Helena Martins.
Nia hatutan, orsamentu ida aprova iha tinan 2023, 2024 too 2025 nee, ninia paradeiru nee iha neebe, estadu nee laiha krize ruma, laiha politiku neebe inserteza, politiku laiha justu, tanba saida mak implika fali ba ida nee, tanba nee mak buka atu rezolve.
Entretantu parte husi tekniku Visi Ministru Asuntu Parlamentar nian sei envia preokupasaun hirak nee ba ministeriu kompotente hodi rezolve iha tempu badak.
(EST 2)
