DILI, STLTIMORLESTE.com – Parlamentu Nasional (PN) liu husi Bankada Partidu Libertasaun Popular (PLP) husu Primeiru Ministru (PM), Kay Rala Xanana Gusmão atu kontrola membru governu sira neebe lalin malu beibeik ba estranjeiru hodi afeta ba ezekusaun kiik, nunee povu labele senti dezenvolvimentu.
“Senhor Primeiru Ministru, aproveita ho diskusaun Orsamentu Jeral Estadu (OJE) 2025 nee se bele karik redus mos viajen estranjeiru ba membru governu sira, se konvite mai husi nasaun vizinhu sira ba membru governu balun se karik membru governu nee ba ho ema ida lae nain rua deit, ita lalika lalin malu hanesan ita viajen husi Dili ba Aeleu no same,” hatete Deputadu Abel dos Santos iha ambitu debate OJE 2025 iha faze jeneralidade, Kinta nee ( 07/11/2024).
Governu tuir Deputadu nee presiza redus viajen estranjeiru sira hodi haree servisu iha rai laran, hodi foku ba dezenvolvimentu iha rai laran, tanba ezekusaun nee bele hanesan ho implementasaun iha terenu.
“Primeiru Ministru karik halo mudansa ba viajen estranjeiru ba, tanba iha semana ida liu ami enkontru ho membru governu sira ami haree, iha ministeriu barak mak ami haree sira nia ezekusaun balun too ona 85% no 90% maibe ita haree iha terenu la hanesan ho saida mak sira kolia,” hatete Deputadu nee.
Nia dehan, Governu tenki konsidera mos Embaixador sira neebe destaka iha nasaun amigu, se konvite nee importante membru governu nee bele ba ho ema nain ida ka rua, tanba se ba ema barak mos ema nain ida rua mak sei kolia iha neeba.
“Se eventu ida nee ladun importa se bele diak liu ita koloka ita nia Embaixador ida neebe mak ita destaka iha nasaun neeba konvida ita nee tanba nia reprezenta ita nia nasaun,” hatete nia.
(alb)
