DILI, STLTIMORLESTE.com – Bankada Partidu Libertasaun Popular (PLP) iha uma fukun Parlamentu Nasional (PN) husu Primeiru Ministru (PM), Kay Rala Xanana Gusmão atu labele fase liman ba lista veteranu neebe oras nee preokupasaun ema hotu nian.
Dehan Visi Prezidente Bankada PLP, Deputadu Helder Freitas “Kamarudin” liu husi deklarasaun politika Bankada PLP iha PN, Tersa (21/01/2025)
“Senhor Xanana Gusmão, pelumenus buka solusaun ba asuntu veteranu, laos fase liman iha asuntu ida nee, neebe ninian Governu rasik mak kria,” deklara Deputadu Helder Freitas “Kamarudin”.
Nia hatutan, Primeriu Ministru Xanana Gusmão tenke responsabiliza oinsa atu bolu atensaun ba Ministeriu Asuntu Kombatentes Libertasaun Nasional (MAKLN) atu buka solusaun.
“Primeiru Ministru dehan katak nia la hatene buat ruma kona-ba lista editál nee, tanba nia laos veteranu ida. Ema hotu iha mundu hatene katak Sr. Kay Rala Xanana Gusmão mak lidera funu nee depois baze apoiu rahun asumi responsabilidade oin-oin no sai nuudar Komandante em Chefe das FALINTIL,” dehan nia.
Eis Estafeta FALINTIL nee hatutan, Xanana nega aan laos veteranu nee hanesan meius atu lakohi veteranus eziste iha Timor Leste. “Oinsa Sr. Xanana bele dehan katak nia laos veteranu, se ema ida ho kaliber Komandante em Chefe laos veteranu, entaun nia lakohi atu veteranu eziste iha Timor Leste. Nuudar Komandante em Chefe, Sr. Xanana, atual Primeiru Ministru asumi responsabilidade politika no moral ba ninian subordinadu sira. Maibe ho deklarasaun ida nee, parese Sr. Xanana lakohi veteranu eziste iha Timor Leste,” hatete Eis Estafeta FALINTIL nee.
Hatan ba kestaun nee, Visi Ministru Asuntu Parlamentares, Aderito Hugo rezeita deklarasaun husi Visi Prezidente Bankada PLP, Deputadu Helder Freitas “Kamarudin” neebe deklara katak, Primeiru Ministru (PM), Xanana Gusmão fase liman ba problema lista veteranu neebe publika iha loron hirak liu ba.
“Dezde sua Eselensia Kay Rala Xanana Gusmão sei asumi kargu hanesan Prezidente Republika (PR) iha ninia Gabinete harii kedas politika ida atu haree veteranus sira, tanba nee iha dalan klaran balu dehan sua exelensia la tau matan ba veteranus sira nee sala boot, tanba ema ida hamriik iha oin hodi organiza vontade politika estadu nian mak sua exelensia Primeiru Ministru Kay Rala Xanana Gusmão,” hatan Aderito.
(alb)
