DILI, STLTIMORLESTE.com – Bankada Partidu Libertasaun Popular (PLP) iha Parlamentu Nasional kestiona Prezidente Autoridade Portuariu Timor Leste (APORTIL), neebe preve kedas orsamentu kuaze rihun US$ 785 hodi halo manutensaun ba roo Berlin Nakroma.
Kestaun nee Xefe Bankada PLP, Deputada Maria Angelina Sarmento ba jornalista sira iha resintu PN, Tersa nee (11/03/2025).
“Kustu ba manutensaun rihun US$ 785, neebe se ita kompara ho kustu manutensaun iha mandatu VIII Governu Konstitusional nian gasta deit rihun US$ 200, entaun pergunta boot tanba saida mak roo ida kondisaun hanesan, ninia manutensaun ida uluk rihun US$ 200, maibe ida agora nee too tiha rihun US$ 785,” hatete Deputada Maria Angelina Sarmento .
Nia hatutan, momentu roo nee ba halo manutensaun, wainhira roo nee atu atraka iha neeba ninia sangar nee tau tun tasi la kaer metin rai henek, entaun anin makaas roo ida mai soke tan tiha roo nee too nakbetok tiha, lo-loos sira hadia roo nee, maibe sira dumpul deit no manutensaun ba ida nee mos la diak.
“Entaun ita presiza halo investigasaun, normalmente sira uza razaun forsa natureza tanba anin boit, normalmente roo ida atu atraka iha fatin ida ita sempre hatene kona-ba konfisoesn iha neeba, se anin boot entaun tenke informa para sira hodi tau ankor, ankor nee metin, sira uza razaun dehan ankor nee tau tun ba tasi laran la metin no anin huu ikus mai roo ida para besik roo Berlin Nakroma nee soke ita nia roo nee,” dehan nia.
Aleinde nee Deputada nee mos simu informasaun katak, normalmente roo sira nee sempre iha buat ida Safety nee ba pasajeiru sira, maibe momentu ba halo manutensaun iha Surabaya, Indonezia, roo nee nia bote seguransa nee monu tun tiha ba tasi laran, maibe roo nee mai daudaun ona husi Indonezia mai Timor.
Tuir padraun safety iha tasi nia nee dehan katak, kuandu bote seguransa la iha mak roo labele halo operasaun, roo nee kuandu halo operasaun, roo nee kuandu ba halo manutensaun mak fila mai bote ba seguransa la iha, nee tuir lo-loos manutensaun iha Indonezia nee labele autoriza roo nee fila mai Timor, tanba nia la prienxe padraun ida neebe safety iha tasi laran nee.
Hatan ba ida nee, Visi Ministru Asuntu Parlamentares, Aderito Hugo katak, kestaun kona-ba kustu manutensaun ba roo Berlin Nakroma nee mais tekniku liu, tanba nee sei envia ba Ministru Transporte no Telekomunikasaun hodi tau ba konsiderasaun.
(alb)
