DILI, STLTIMORLESTE.com – Bankada Partidu Libertasaun Popular (PLP) iha Parlamentu Nasional preokupa ho projetu husi Millenium Challenge Account Timor Leste, Institutu Publiku neebe atu halao prosesamentu ba Bee foer ba bee moos iha Bebonuk seidauk lao.
Kestaun nee Deputada Maria Angelina Sarmento deklara wainhira governu ho Parlamentu Nasional diskuti hela orsamentu ba Millenium Challenge Account Timor Leste, Institutu Publiku iha Parlamentu Nasional, Kuarta (20/11/2024).
“Projetu Millenium Challenge Account ba tratamentu bee moos iha parte Bebonuk nian no momentu audiensia ami foti ona maibe ami hakarak husu, tanba saida mak projetu nee too agora seidauk implementa iha Dili laran,” hatete Deputada Bankada PLP, Maria Angelina.
Deputada nee hatutan, prosesu negosiasaun ho Millenium Challenge Coorporations nee lori tempu neebe naruk tebes no kriteria ida neebe MCC, aplika mak tenki promove boa governasaun no transparensia iha implementasaun projetu nee.
“Tanba nee ikus ita ratifika akordu ida ho Millenium Challenge Coorporations, ho nunee mak estabelese Millenium Challenge Account nuudar Institutu Publiku ida, maibe iha prosesu implementasaun nee ita haree lentu demais ba prosesu ida nee, tanba ita mos tau ita nia osan sira hodi apoiu,” dehan nia.
Hatan ba ida nee, Ministra Finansas (MF), Santina Cardoso Viegas katak, projetu prosesamentu bee foer iha Bebonuk seidauk lao, tanba governu seidauk halo Indemnizasaun ba populasaun sira.
“Projetu Millenium Challenge Account nee han tempu oituan, tanba hanesan ita hatene katak rai neebe ita atu utiliza hodi implementa projetu prosesamentu bee foer iha Bebonuk nee maioria rai privadu,” hatan Ministra Finansas (MF), Santina Cardoso.
(alb)
