DILI, STLTIMORLESTE.com – Primeiru Ministru (PM) Australia Anthony Albanese sente impresionadu, tanba lideransa Timor Leste hamutuk ho povu simu nia husi Aeroportu too mai Palasiu Prezidensial ho amizade diak tebes.
Lia nee hatoo husi Primeiru Ministru Kay Rala Xanana Gusmão ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (29/01/2026).
“Ohin ami koalia kona-ba vizita horiseik, maske loron manas boot husi Aeroportu too Palasiu mais too kalan Primeiru Ministru Australia Anthony Albanese impresionadu ho ita nia amizade ba nia,” dehan Primeiru Ministru Xanana Gusmão.
Primeiru Ministru hatete, amizade tanba iha kedas tempu rejistensia nia mos sai nuudar ativista boot ida defende Direitu ba Timor Leste ba ukun rasik aan, ho ida nee hotu mak horiseik simu grande Kolar Ordem Timor Leste.
Laos deit nuudar Primeiru Ministru, maibe haree mos husi nia pasadu, depois sae ba Primeiru Ministru ho Timor Leste iha kooperasaun neebe diak. Nia kontente tebes, no ohin despede nia.
Aleinde nee iha kuarta kalan Prezidente Republika Jose Ramos Horta hamutuk ho Primeiru Ministru Kay Rala Xanana Gusmão iha jantar gala ofisial ida neebe prestijiozu iha istoriku Palasiu Nobre, Lahane, hodi onra Primeiru Ministru Australia, Onoravel Anthony Albanese.
Eventu neebe organiza husi Governu Timor Leste nee, sai hanesan pontu aas liu husi vizita ofisial nee, hodi halibur hamutuk lideransa nasaun nian, korpu diplomatiku, no ilustre konvidadu sira iha fatin ida neebe hateke duni ba sidade kapital.
Prezidensia nota katak kalan nee sai hanesan selebrasaun klean ba “ligasaun neebe labele nakdoko” no istoria ida neebe fahe ba malu hodi hametin povu Timor-Leste no Australia.
Durante jantar nee, Prezidente Ramos Horta tuur hamutuk ho Primeiru Ministru Albanese no Primeiru Ministru Xanana Gusmão, neebe refleta jestu amizade pesoal no respeitu mutuu neebe eziste entre líder sira-nee. Prezidensia foka mos ba kalan nee nuudar sasin ba espíritu “família” husi relasaun bilateral, neebe hametin liutan ho aprezentasaun kantu no dansa kultural Timor nian neebe moris tebes.
Prezidente Republika hamutuk ho nia kolega sira halo brinde ba amizade neebe dura entre nasaun rua, hodi enfatiza katak enkontru sira iha Palasiu Nobre istoriku nee hametin liutan ligasaun kultural no sosiu-polítika neebe liu fali diplomasia formal.
Jantar Gala nee akontese depois loron ida ho dezempenu diplomatiku neebe signifikativu, inklui konferimentu Grande-Colar Ordem de Timor-Leste ba Primeiru Ministru Australia. Iha atmosfera festiva no elegante nee, Prezidente no Primeiru Ministru Timor Leste nian reafirma fali sira-nia kompromisu ba futuru ida ho prosperidade hamutuk no estabilidade rejional ho Australia.
(eme)
