DILI, STLTIMORLESTE.com – Primeiru Ministru Australianu, Anthony Albanese to’o ona iha Aeroportu Internasional Prezidente Nicolau Lobato, Komoro, Dili, ho aviaun Royal Australian Air Force ho Numeru A 62-002 iha tuku :09:50 OTL, hodi halao vizita loron rua, husi loron 28-29 Janeiru 2026.
Iha Aeroportu Internasional Prezidente Nicolau Lobato, Xefe Governu Australia nee simu direita husi husi Prezidente Repúblika, José Ramos Horta no Primeiru Ministru Kay Rala Xanana Gusmão ho membru IX Governu Konstitusional balun.
Aleinde membru IX Governu Konstitusional, iha mos Embaixadora Australia ba Timor Leste, Caitlin Wilson inklui diplomata sira husi Embaixada Australia iha Timor Leste, simu Primeiru Ministru Australia, Anthony Albanese iha Aeroportu Internasional Prezidente Nicolau Lobato, Komoro, Dili.
Bainhira tun husi aviaun Royal Australian Air Force, Primeiru Ministru Australia, Anthony Albanese, simu ho dansa kultural neebe aprezenta husi grupu dansa kultural tolu kompostu husi grupu Wehali, Leziaval no Santo Antonio hamutuk ema nain 150 resin. Sira aprezenta dansa kultural hodi kaer bandeira Timor Leste no Australia.
Primeiru Ministru Anthony Albanese kaer liman ho Prezidente Repúblika, José Ramos Horta no Primeiru Ministru Kay Rala Xanana Gusmão no membru IX Governu Konstitusional sira antes aprezenta arma no kontenensia husi militar FALINTIL-Forsa Defesa Timor Leste.
Hafoin nee, Primeiru Ministru Anthony Albanese akompania husi Prezidente Repúblika, José Ramos Horta no Primeiru Ministru Kay Rala Xanana Gusmão nomos Embaixadora Australia ba Timor Leste, Caitlin Wilson, hakat ba Salaun VIP hodi deskansa oituan antes sai ba Palasiu Prezidensial Nicolau Lobato, Bairo Pite, Dili.
Husi Aeroportu Internasional Prezidente Nicolau Lobato, Primeiru Ministru, Anthony Albanese hamutuk ho Primeiru Ministru Timor Leste, Kay Rala Xanana Gusmao sae kareta privadu Prezidente Republika Timor Leste, Jose Ramos Horta neebe kondus rasik husi Prezidente Ramos Horta.
Bainhira sai husi Aeroportu Internasional Prezidente Nicolau Lobato, Primeiru Ministru, Anthony Albanese, simu husi estudante sira husi Eskola Baziku, Eskola Pre-Sekundaria no Sekundaria ho sira nia profesor neebe forma iha dalan ninin hodi kaer bandeira Timor Leste no Australia nomos Primeiru Ministru Anthony Albanese nia fotografia.
Tuir observasaun STL nian iha terenu hatudu katak bandeira Timor Leste no Austrália monta iha estrada prinsipál husi Aeroportu Prezidente Nicolau Lobato, Komoro, Dili too iha Palásiu Prezidensiál Nicolau Lobato, Palasiu Governu no Palasiu Nobre Lahane inklui Otel Palm Spring Fatuhada.
Iha dalan protokolu kapital sidade Dili, instala poster boot ho foto Primeiru-Ministru Austrália nian ho liafuan Ingles “Welcome To Timor-Leste, The Honourable, Anthony Albanese MP, Prime Minister Of Australia” 28-29 January 2026 no bandeira Timor Leste no Austrália nian.
Bainhira to’o iha Palasiu Prezidenzial Nicolau Lobato, Bairo Pite, Priministru Anthony Albanese, simu ho parade militar husi FALINTIL-F-FDTL. Hotu tiha Primeiru Ministru Anthony Albanese halao enkontru ho Prezidente Republika, Jose Ramos Horta. Enkontru hotu Primeiru Ministru Anthony Albanese nee liu ba deskansa iha Otel Palm Spring Fatuhada.
Primeiru Ministru Austrália Anthony Albanese, agradese ba konvite husi Primeiru Ministru Kay Rala Xanana no Gusmão no Prezidente Repúblika José Ramos-Horta, tanba vizita nee nuudar onra boot ida ba nia.
Primeiru Ministru Australianu, Anthony Albanese konsidera viajen nee importante tebes ba nasaun vizinhu ida neebé besik liu.
(mik/jen/ger)
