DILI, STLTIMORLESTE.com – Sekretariu Estadu Komunikasaun Sosial (SEKOMS), Expedito Dias Ximenes akompanha husi Asesor Komunikasaun Sosial, Augusto Turki hatete, SEKOMS sei limita asesu Media Officer sira iha vizita Primeiru Ministru (PM) Australia, Anthony Albanese mai Timor Leste iha 28-29 Janeiru 2026.
SEKOMS, Expedito Dias Ximenes hatoo kestaun nee bainhira halao enkontru koordenasaun ho Xefe Redasaun no Jerente Media Eletronika no Media Emprime sira, hodi halo preparasaun ba kobertura PM Australia, Anthony Albanese, iha Sala Reuniuan DNDM-SEKOMS, Palasiu Governu, Dili, Sesta (23/1/2026).
Tuir Expedito, SEKOMS halao enkontru ho Xefe Redasaun sira, Diretor Informasaun sira no Dirijente meiu komunikasaun sosial sira hodi koalia kona-ba oinsa atu halo kobertura ba PM Australia, Anthony Albanese, neebe sei vizita Timor-Leste iha loron 29 Janeiru 2026.
“Enkontru nee bazeia ba reuniaun ikus entre komisaun organizadora ba preparasaun vizita PM Australia, Anthony Albanese neebe halao iha Kinta (22/1/2026) neebe lidera husi Vise-Primeiru-Ministru, Francisco Kalbuadi Lay no enkontru ho Xefe Redasaun sira, Diretor Informasaun sira no Dirijente meiu komunikasaun sosial sira nee fo sai regulamentu kobertura ba media sira hotu bele hatene, atu nunee bele lao tuir regra protokolu neebe iha ona. Atu nunee, Xefe Redasaun sira bele orienta sira-nia jornalista sira iha fatin-fatin neebe PM Australia sei vizita,” hatete Expedito.
Jestor meiu komunikasaun sosial sira hotu neebe partisipa iha enkontru nee aseita ho regulamentu neebe governu fo sai no sei orienta jornalista sira halao kobertura ho masimu tuir regulamentu neebe iha ona.
Expedito mos hatete, enkontru ho jestor meiu komunikasaun sosial sira nee importante tebes, tanba ho regulamentu neebe iha, jestor meiu komunikasaun sosial sira bele orienta sira nia jornalista sira halao kobertura tuir regulamentu neebe iha, tanba iha vizita Primeiru Ministru Malazia, Anwar Ibrahim iha Timor Leste akontese situasaun neebe ladun diak. Tanba nee, iha vizita PM Australia nian nee, SEKOMS limita asesu Media Officer sira.
Tuir orariu neebe iha, loron 28 fulan-Janeiru, PM Australia, Anthony Albanese sei too iha Timor-Leste ho aviaun privadu tuku 09h00 neebe sei simu direta husi Prezidente Republika Jose Ramos Horta no Primeiru-Ministru Kay Rala Xanana Gusmão, sai husi Aeroportu Internasional Prezidente Nicolau Lobato Dili kontinua kedan ba Palasiu Prezidensial Nicolau Lobato Dili.
Durante iha Palasiu Prezidensial, PM Australia, Anthony Albanese sei halao enkontru ho Prezidente Republika, Jose Ramos-Horta, bainhira ramata enkontru PM Australia, Anthony Albanese, liu ba deskansa iha Otel Palm Spring Fatuhada, Dili.
Hafoin deskansa durante minutu 15, PM Anthony Albanese kontinua vizita ba Palasiu Governu hodi halao enkontru bilateral ho Xefe Governu Kay Rala Xanana Gusmão, hafoin ramata lider Australiano nee hakat liu ba Parlamentu Nasional.
“Iha Palasiu Governu sei iha deklarasaun konjunta PM Australia, Anthony Albanese no PM Timor Leste, Kay Rala Xanana Gusmao,” katak Expedito.
Iha loraik, Anthony Albanese neebe akompaina husi Prezidente Republika, Jose Ramos Horta no Xefe Governu, Kay Rala Xanana Gusmao ba Palasiu Nobre Lahane, Dili, hodi jantar hamutuk no iha loron 29 fulan-Janeiru dadeer, tuku 07h00, PM Australia, Anthony Albanese ho nia delegasaun fila hikas ba Australia.
(mik)
