PORTUGAL, STLTIMORLESTE.com – Primeiru Ministru (PM) Kay Rala Xanana Gusmão vizita Universidade dos Açores (UAc) no OKEANOS-Instituto de Investigação em Ciências do Mar, iha Rejiaun Autómoma Açores, Portugal, hodi enkoraja Timoroan nain 2 atu estuda ho diak fila ba implementa matenek iha Timor.
Durante vizita, responsável Universidade halo aprezentasaun kona-ba vizaun no misaun universidade nian, inklui aprezentasaun kona-ba prosesu instalasaun edifísiu Universidade nian liu husi vídeo dokumentáriu.
“Xefi Governu Kay Rala Xanana Gusmão Enkoraza estudante Timoroan nain 2 neebé daudaun nee halao hela estudu iha Eskola Tékniku Vokasionál Açores atu estuda ho diak, nunee fila-fali bá implementa matenek no esperiénsia iha Timor”, haktuir komunikadu neebe STL asesu Kinta (17/10/2024).
Estudante Varelia Soares Ribeiro no Olancia Varela Quintão, hela iha Ilha São Miguel neebé besik liu ho Açores, no sira nai rua hetan bolsu estudu husi Governu Rejionál Açores ho durasaun tinan 3 no kompleta ona tinan 1.
Estudante sira nee halao estudu iha área otelaria no promete sei estuda diak atu fila-fali mai aplika iha Timor.
Enkuantu UAc iha fakuldade 6 mak hanesan, Fakuldade Siénsia Sosiál, Siénsia Agrária no Ambiente, Siénsia no Teknolojia, Ekonomia no Jestaun, Teknolojia no Administrasaun, ikus liu Fakuldade Saúde.
UAc akumula estudante 3.191, kompostu husi estudante estranjeiru 364, Europa nain 186, Áfrika nain 177, Amérika-Súl nain 45 no Ázia nain 10.
Enkuantu iha OKEANOS-Institutu de Investigação em Ciências do Mar, responsável Institutu halo uluk aprezentasaun kona-ba prezerva espésie no biodiversidade inklui vizita laboratóriu.
Durante vizita PM Xanana akompanha husi Visi Primeiru Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas, Sekretáriu Estadu Komunikasaun Sosiál, Expedito Dias Ximenes, Embaixadora Timor Leste iha Portugal, Isabel Guterres, Embaizadora Portugal iha TL, Manuela Bairos, no Xefi Gabinete PM, Elizabeth Exposto, no Koordenadora Ekonomia Azúl, Maria Inês de Araújo.
(gui)
