DILI, STLTIMORLESTE.com – Primeiru Ministru (PM), Kay Rala Xanana Gusmão agradese ba kritikus husi bankada opozisaun no hotu-hotu nia kontribuisaun ba debate proposta Orsamentu Jeral Estadu (OJE) 2025, neebe pasa iha jeneralidade.
Xefi Governu Xanana Gusmão hatoo liafuan agradese nee iha intervensaun ikus iha debate proposta OJE 2025 iha Parlamentu Nasional, Sesta nee (08/11/2024).
“Agradese ba hotu-hotu nia kontribui ba debate no ba hadia dalan atu dezenvolve Timor. Debate demokratiku akontese duni durante loron 3. Agradese bá krítika hotu-hotu, liu-liu husi bankada opozisaun no Governu rona ho atensaun atu bele implementa planu no programa diak hodi haree bá povu nia moris”, katak PM Xanana.
Xanana hatete, husi Governu so bele tau atensaun no tau iha ulun kona-ba retorika, loos duni sei buka tuir Bankada PD nia husu iha final deklarasaun ba Membru Governu tomak, ita tenke buka servisu ho diak no bele husu ba Bankada PD no CNRT bele monitoriza no fiskaliza ba implementasaun OJE nee, atu labele sai retorika deit, tanba nee husu mos kontribuisaun bankada opozisaun, tuir Prezidente Bankada FRETILIN dehan, saida mak bele partisipa ba diak povu nian tenke hamutuk, hamutuk laos iha projetu maibe hamutuk iha monitorizasaun no fiskalizasaun.
Xefi Ezekutivu nee husu PN kada fulan ou kada fulan 3 bolu Governu mai atu responde ba saída mak halo ona, nunee bele dehan retorika neebe tau iha proposta OJE 2025 halo ona nuudar realidade .
Primeiru Ministru Xanana husu deputadu sira husi bankada opozisaun atu kontinua hatoo krítika bá Governu.
Xanana mos bolu mós atensaun bá membru Governu atu aleinde iha responsabilidade bá povu, iha mós responsabilidade bá Parlamentu Nasionál.
(gui)
