DILI, STLTIMORLESTE.com – Tama ba tinan 2025 nuudar tinan implementasaun programa sira, tanba nee IX Governu Konstitusionál sei implementa planu no polítika dezenvolvimentu nasaun nian iha tinan nee. Ho nunee Primeiru Ministru (PM) Kay Rala Xanana Gusmão husu ba funsionariu públiku atu servisu makaas hodi lori povu ba moris diak.
Xefe Governu husu nee liu husi diskursu bainhira prezide Isar Bandiera Nasional semana da-huluk fulan Janeiru tinan 2025, iha Palasiu Governu, Dili.
“Ba funsionariu sira hakaas aan servisu makaas, servisu ho diak. Hau halo apelu ida ba Diretor Jeral sira, Diretor Finansas, Aprovijionamentu, atu servisu, lae too ona tinan nia rohan mak hakaas aan ezekuta orsamentu lalais, maibe sabraut deit,” katak PM Xanana.
Nia dehan, iha trimestre dahuluk 2025, tenke haree ona, tanba Orsamentu Jeral Estadu halo husi pediddu kada ministeriu. Neebe iha trimestre dahuluk nee haree saida mak atu book ona, se lae too tiha fulan Julhu mak foin halo aprovizionamentu, nee hatudu deit frajilidade Estadu no inkompetensia.
Primeiru Ministru kontinua apela ba direjente sira atu jere osan povu ho di-diak hodi hadia povu nia moris no nasaun, tanba tinan 2025 sei tun direta bá munisípiu hodi haree implementasaun programa sira.
Xanana Gusmão fo hanoin katak, IX Governu kaer ukun iha Julhu 2023, mai laos tanba matenek liu, maibe mai atu hadia instituisaun Estadu neebe envez de lao ba oin maibe hakiduk.
Tanba nee iha prosesu konstrusaun Estadu, PM husu atu hotu-hotu servisu makaas iha kada tinan, kada fulan, kada semana no kada loron hodi bele hadia diak liu-tán sistema iha instituisaun Estadu nian.
PM Xanana husu beibeik, tanba bainhira konsolida kapasidade ho profisionalizmu iha instituisaun Estadu mak Estadu ne’e sai Estadu forte, no laós Estadu frázil.
Husu mos ba Komisaun Funsaun Publika (KFP) atu idak-idak servisu nafatin, maske iha problema barak maibe labele halo milagre, no sei buka atu hadi’a neineik liu husi halo korresaun nunee Instituisaun Estadu bele sai metin liu tan.
Xefe Governu bolu atensaun ba KFP atu bainhira halo rekrutamentu ba funsionariu publiku tenke halo uluk teste mak Hino Nasional “Patria-Patria” no Hino Funsaun Publika, tanba Xefe Governu nota katak iha funsionáriu barak mak la dekór múzika rua ne’e no la hatene kanta.
Partisipa iha isar Bandeira nee mak Funsionariu sira husi Gabinete Primeiru Ministru, Gabinete Fronteira Marrítima no Terrestre, Visi Primeiru Ministru, Ministru Koordenador Asuntu Sosial no Ministru Dezenvolvimentu Rural no Abitasaun Komunitária, Prezidénsia Konsellu Ministru, Gabinete Visi Ministru Asuntu Parlamentar, Sekretaria Estadu Igualdade (SEI), Sekretaria Estadu Komunikasaun Sosial (SEKOMS, Komisaun Funsaun Públika (KFP), Sentru Nasional Chega (CNC), Inspesaun Jeral Estadu (IGE), Institutu Defeza Nasional (IDN).
(gui)
