DILI, STLTIMORLESTE.com – Primeiru Ministru (PM) Kay Rala Xanana Gusmão hatete, ohin nia informa ba Prezidente Republika katak, IX Governu Konstitusional sei taka atividade Grupu Arte Marsiais no Arte Rituais.
Primeiru Ministru Kay Rala Xanana Gusmão hatoo kestaun nee ba jornalista sira bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nikolao Lobato, Bairu Pite, Kinta (22/05/2025).
Primeiru Ministru hatete, foin lalais selebrasaun loron importante 20 Maiu buat hotu lao diak, maibe iha fatin balun mosu konfrontu ou violensia oituan, husi problema neebe iha Governu identifika katak problema nee husi Grupu Arte Marsiais no Arte Rituais, tanba nee Primeiru Ministru informa ba Prezidente katak Governu sei toma pozisaun taka tiha Arte Marsiais neebe estraga joven sira.
Iha biban nee, Primeiru Ministru hatoo kongratula ba povu Timor Leste neebe selebra loron importante ho unidade, maske iha feira no konsertu neebe loke husi Governu loron 5 kalan 5 maibe atividade hotu lao hakmatek.
Primeiru Ministru hatete, ho problema neebe akontese iha rai laran, Governu liu husi Konselhu Ministru sei taka atividade Grupu Arte Marsiais no Arte Rituais.
“Buat hotu lao diak maske iha fatin balun sei iha problema, nee mak hau ohin temi tiha ona ami sei haree iha Konselhu Ministru diak liu ita taka ona tanba buat nee mak halo joven sira asaltu malu, ami rua primu mais nia PSHT nia 77, ita nain tolu primu prima hotu mais ida nee 22 ita haree malu landiak ita fahe malu, balun dehan fali Arte Marsiais nee husi Timor mak ba kuitadu, husi Timor mak ba se mak hahoris karik la hatene Arte Marsiais,” katak PM Xanana.
Primeiru Ministru hatete, razaun taka atividade Grupu Arte Marsiais no Arte Rituias iha rai laran tanba haree ba realidade joven sira neebe inklina aan iha grupu nee uza sala, kontinua uza baku malu no halo violensia, tanba nee Governu liu husi Konselhu Ministru sei deside taka atividade.
Tanba iha relatoriu sira nia problema baku malu tuda malu nafatin iha fatin fatin, nee duni tenke hasai tiha buat ida nee.
(eme)
