DILI, STLTIMORLESTE.com – Primeiru Ministru (PM), Kay Rala Xanana Gusmão kontente sai sasin ba iha distribuisaun livru “O Meu Mar, O Meu Timor” ba Servisu Edukasaun Munisipal sira.
“Hau kontente mai iha nee hodi sai sasin inisiu ba iha distribuisaun livru, ohin ita hotu haree tiha ona, hau nia tasi, hau nia Timor, tanba ita idak-idak halao ida mak tasi, tasi ibun nee dala ruma ba haris tasi, maibe introdusaun livru ida nee ba too iha eskola, liu-liu ba imi sei kiik sira nee, nee atu fo hanoin ba imi katak, tenke hadomi ambiente, labele soe plastiku no lixu arbiru, hahu husi imi nia uma too iha eskola, hau liu husi eskola barak foer soe sasan arbiru deit,” afirma PM, Xanana liu husi nia diskursu, bainhira halao distrisaun livru iha sentru impresaun, Komoro, Dili, Kinta nee (13/03/2025).
PM Xanana hatutan, iha fatin balu labarik feto no mane sira ba subar aan tiha iha uma laran, bainhira sei kiik, iha fatin balu manas tebes no iha fatin balu udan nee mai barak liu, nee hotu tanba mudansa klimatika, bee la sai too iha estrada deit, tanba kanu sira nee nakonu ho plastiku, mai husi neebe, laos husi estrada rasik, husi uma, husi neebe, tinan rua ho balu kotuk ba iha merkadu Taibesi, udan makaas bee la tama, iha fatin sira nee buka hamoos kanu no plastiku nakonu.
“Kuandu ita estraga ita nian tasi, aban bainrua imisei boot dehan, katuas no ferik sira uluk nee hadomi ita nian tasi, agora ita mak tenke hadia fali, ba labarik sira laos imi atu aprende lee deit, no husu ita nian profesor sira hanorin labarik sira atu hadomi ambiente, atu iha disiplina labele soe sasan arbiru,” katak nia.
Tanba tuir PM katak, soe foer arbiru lixu sira nee ba hotu iha tasi, nee bele estraga ikan boot sira nee, no estraga animal sira neebe mak moris iha tasi laran, nee duni kuidadu nafatin ita nian tasi, hatene tau lixu iha fatin.
Iha fatin hanesan, Ministra Edukasaun (ME), Dulce de Jesus Soares dehan, tanba iha tasi buat barak loos mak iha tasi, maibe kuandu ema la hatene kuidadu, hanesan soe lixu arbiru no lixu sira nee ba iha tasi, nee sei estraga vida neebe mak iha tasi laran, ho ida nee idade sedu kedas hanorin estudantes sira atu bele hadomi ba natureza liu-liu ba iha tasi ninia.
“Ohin nee distribuisaun livru “O Meu Mar O Meu Timor” ba Diretor Servisu Edukasaun Munisipal hotu, maibe reprezenta husi munisipiu hira, no estudantes balu mai simu kedas livru nee husi Primeiru Ministru (PM), ho objetivu ida katak livru nee hanesan PM mos esplika rasik, iha neeba iha figura kapas kona-ba ita nian tasi, ida nee atu hanorin ba estudante sira oinsa mak sira bele sai joven, labarik aban bainrua sai adultu neebe mak hatene kuidadu ita nian tasi,” tenik nia.
ME Dulce dehan, livrus nee agora sei imprimi kopia, depois sei kontinua tan imprimi, agora daudaun 120 mil kopias, sei kontinua distribui hanesan iha biblioteka kantinhus sira nee.
(jac)
