DILI, STLTIMORLESTE.com – Iha loron Tersa (14/10/2025) Primeiru Ministru (PM) Kay Rala Xanana Gusmão halo vizita ba edifisiu Defensor Publiku iha Mascarinhas no observa mos kondisaun husi edifisiu nee.
“Primeiru Ministru hola inisiativa mai vizita Defensor Publiku, tanba durante Defensor Publiku hamriik dezde 2000 too ohin nee PM foin halo vizita dala uluk no primera vez no halo observasaun iha edifisiu nee, tanba ita hakarak halo konstrusaun edifisiu ida iha Komisaun Revizaun Orsamentu (KRO), kona-ba dezenhu nian orsamentu aprova,” dehan Defensor Publiku Jeral, Cansio Xavier ba jornalista sira iha Kaikoli, Tersa (14/10/2025).
Nia esplika, Prezidente KRO mai rasik haree, inklui Ministru Justisa no mos Ministru Obras Publiku mai iha fatin nee hodi haree, oinsa mak organiza tekniku sira mai haree kona-ba dezenhu neebe ligadu ho Sentral Edefisiu Defensor Publiku nian.
“PM haree fatin neebe tau dokumentus ka arkiva dokumentus sira rai rahun nakonu, la iha espasu atu rai dokumentus sira nee, no vizita ida nee signifikante tebes ba ami Defensor Publiku nia istoria,” nia sublina.
Nia argumenta, kona-ba dezenhu sei prepara hela no hatudu ona ba iha Primeiru Ministru oinsa atu halo nia alargamentu sira, tanba nee Ministru Obras Publiku sei haruka nia tekniku sira mai atu haree, atu halo mapa kadastru ida neebe natoon atu halo konstrusaun tuir padraun neebe iha, bele akumula Defensor Publiku sira iha laran.
Kona-ba orsamentu neebe KRO aprova mak orsamentu duzentos mil ba dezenhu sentral, no proposta nee duzentos oitenta maibe hatun oituan, tanba nesesidade ba kompra veikulu aumenta tanba propoin tolu aumenta tan lima, iha redusaun ba ida nee.
Tanba nee, tinan 2026 la hotu propoin ba tinan 2027 atu halo pagamentu ba dezenhu no BOQ.
Tuir dadus neebe iha, oras nee daudaun rekursu neebe iha Defensor Publiku hamutuk ho ofisial sira 116, Defensor Publiku hamutuk 34 iha mos estajiadu nain 4 neebe halao hela estajiu.
Tuir observasaun STL nian, PM too iha edifisiu refere no kontinua observa kona-ba kondisaun husi edifisiu nee. Depois komunika kedan ba iha Ministru Obras Publiku mos too iha iha fatin refere, hodi haree kona-ba kondisaun edifisiu, tanba tuir planu sei instala edifisiu foun ba iha Defensor Publiku.
Jornalista: Terezinha De Deus
Editor: Xisto Mendonça
