DILI, STLTIMORLESTE.com – Primeiru Ministru (PM), Kay Rala Xanana Gusmão fo orientasaun ba Ministeriu Administrasaun Estatal (MAE) atu kontinua buka solusaun ba problema lixu iha kapital Dili.
Orientasaun nee Primeiru Ministru fo liu husi enkontru ho Ministru Administrasaun Estatal, Tomas do Rosário Cabral, Visi Ministru Administrasaun Estatal, Jacinto Rigoberto G. de Deus no Prezidente Autoridade Munisipiu Dili, Gregório da Cunha Saldanha, iha edifísiu MAE Kaikoli, Dili, Tersa (17/12/2024).
” Oras nee daudaun tama ona bá tempu udan, atu prevene moras oin-oin neebe afeta ba saude publika”, hatete PM, Xanana Gusmão.
Entretantu Prezidente Autoridade Munisipiu (PAM) DILI, Gregorio Saldanha hatete, ohin sira halao enkontru, tanba kompanhia balu hatoo informasaun ba Primeiru Ministru katak, Kompanhia la selu ema sira neebe raut lixu.
“Ami la selu tanba ami nota kompanhia halao servisu la kondis ho kontratu. Tanba kontratu hatete, loron ida kompanhia tenke halao karada 3, hau bainhira atu halo pagamentu sei verifika lai sira nia pedidu, hodi haree kompanhia sira neebe rekolha lixu nee raut dala 3 duni kada loron ka lae, maibe iha kompanhia balu neebe halo rekolha la too dala 3”, deklara PAM Dili, Gregorio.
Nia afirma, iha sira nia verifikasaun ba pedidu kompanhia, haree Kompanhia balu rekolha dala 1 deit iha loron 1, tanba nee selu mos tuir sira nia servisu, maibe kompanhia lakohi simu hakarak selu kompletu, maibe sira nia servisu la kompletu.
“Hau ba Prezidente Munisipiu atu salva Dili, tanba nee ami verifika ate husu Ministériu Administrasaun Estatal atu halo auditoria, nunee seidauk halo pagamentu ba kompanhia no kompanhia nee ba kesar”, tenik nia.
Nia hatete, agora rezolve ona, tanba hetan Autorizasaun husi lideransa atu halo pagamentu, maibe tenke selu tuir sira nia servisu. Kompanhia neebe rekolha lixu iha Dili 3 deit, iha Dili Leste, ida iha Dili Oeste, maibe agora loron 6 ona la rekolha lixu, tanba nee hau orienta ho Pax atu halo limpeza no raut.
Mezmu nunee, maibe la fasil, tanba lixu barak demais, imajina loron ida deit lixu nakonu ona, oinsa ho loron 6, tanba lixu nee produz lixu barak demais.
(gui)
