DILI, STLTIMORLESTE.com – Primeiru Ministru (PM), Kay Rala Xanana Gusmao relata rejime juridiku Grupu Arte Marsiais (GAM) nian neebe Governu liu husi Konselhu Ministru aprova ba Prezidente Republika (PR), Jose Ramos Horta hodi fo solusaun.
Xefe Estadu dehan, Konselhu Ministru halo rezolusaun ida koalia kona-ba arte marsiais laos taka agora, maibe halo regra diak ida hodi regula.
“Informa ba Prezidente Republika katak, iha Konselhu Ministru ami halo rezolusaun ida kona ba Arte Marsiais laos taka agora kedas, mais halo regra neebe diak para sira bele funsiona ho regra no buat sira nee karik la tuir mak taka tanba sira laiha kontrola ba malu,” dehan PM, Xanana ba jornalista sira bainhira remata enkontru ho PR iha Palasiu Prezidensial, Nicolau Lobato, Kinta (14/08/2025).
Nunee mos Prezidente Republika, Jose Ramos Horta hatutan, ohin hasoru malu ho Primeiru Ministru koalia kona-ba regra ba arte marsiais.
“Koalia ho Primeiru Ministru, Primeiru Ministru hakarak lider arte marsiais mak tenke hatudu kapasidade firmeza para kontrola sira nia membru, hau laiha problema sira ba aAambua simu diploma ka ba Kupang ka ba neebe, tanba nee mos normal, sira neebe mak tuir Taekwondo sira hakarak ba Korea mak mai, no sira neebe mak kongfu boot liu mak Xina, Karate boot liu Japaun, se karik hakarak ba simu mestri nia liman iha Japaun, Korea maibe kuitadu sira ba Atambua aproveita han nasi goren ruma iha neeba, aproveita simu diploma, hau la preokupa ida, maibe ba tenke legalmente,” dehan PR, Horta
Prezidente Republika hatete, Timoroan barak mak sei beik tanba ba deit Atambua selu US$ 200, nunee ema rihun ida mak ba US$ 20 mak tama ba iha Atambua, nusa la konvida sira mai hasae sabuk iha Timor deit, duke subar subar ba sae sabuk iha Aambua selu osan boot.
“Joven sira lubuk ida simples povu kiik nia oan sira nee hetan diploma mai husi arte marsias nee hetan diploma sira sente orgulhu, problema mak ida nee, maibe labele liu husi dalan laho nia, hau triste mak ema sira iha neeba mak manan osan boot,” katak PR, Horta.
Prezidente Republika hatete, dala ruma mosu problema dun hotu ba Arte Marsiais, maibe joven nee estudante mos entaun taka univesridade ka taka arte marsiais, tanba nee Prezidente Republika la konkorda taka arte marsiais.
“Nee duni hau la konkora taka arte marsiais, hau fo apoiu liu ba sira hakoak no hadomi sira, tanba joven sira nee atividade desportu mos laiha, maibe maun Xanana komprende buat sira nee hakarak ajuda sira, mais koalia makaas ho lider boot GAM para kontrola membru,” katak Xefe Estadu.
(eme)
