DILI, STLTIMORLESTE.com – Primeiru Ministru (PM), Kay Rala Xanana Gusmão hatete, ohin hasoru Prezidente Republika (PR) fo hatene kona-ba dekretu lei neebe mak Konselhu Ministru (KM) aprova ona, orsida haruka mai PR promulga.
Xefe Governu hatoo lia hirak nee ba jornalista sira, bainhira remata halao enkontru ho Prezidente Republika iha Palasiu Prezidensial, Nicolau Lobato, Bairo Pite, Kinta (12/12/20240).
“Ohin mai hasoru malu ho Prezidente mai fo hatene ba Prezidente Republika katak, reuniuan Konselhu Ministru aprova dekretu lei lubuk ida ona, neebe orsida ba haruka kedas mai, tanba Prezidente Republika sai iha 14 dias para promulga tiha, ida mak regra neebe hasai kona-ba ezekusaun orsamentu tinan 2025, tanba kuandu laiha regra didiak sai problema boot iha jestaun finanseiru nia nee problema boot,” dehan PM, Xanana.
Primeiru Ministru hatete, problema boot foun ida neebe mai husi ezekusaun orsamentu nian, iha auditoriu interna hodi haree didiak, tanba lae osan povu nia gasta arbiru deit.
“Iha regra sira nee hotu ami mos haree ba aprovizionamentu, tanba ita haree katak, kompanhia kaer projetu 4 no 5 nee ida lao la lao, neebe depois prosesu aprovizionamentu buat sira nee tenke liu ho hau para hau hatene, kompanhia sira nee tinan kotuk hira no lao ka lae, se lae mak ita nunee hela deit,” hatete Xefe Governu.
Xefe Governu dehan, atu fo hanoin deit katak, kompanhia ida simu projetu iha 2015 too agora iha Bebonuk neeba, maibe bolu labarik sira mak kee hela, ida nee susar.
“Hau hein hela Obra Publiku ho MPI atu halo avaliasaun ida kompanhia A nasional projetu sira halo hira depois haree ona, tanba saida mak simu deit fo nafatin neebe atu hadia diak iha futuru se deit mak mai kaer fali Governu iha regras, se lae ita nunee hela deit,” katak nia.
Konselhu Ministru halao sorumutu iha Palasiu Governu, kuarta Aprova projetu Dekretu-Lei neebe aprezenta husi Ministra Finansas, Santina Jose Rodrigues F. Viegas Cardoso, kona-ba Ezekusaun Orsamentu Jeral Estadu ba tinan 2025.
Diploma ida nee estabelese regras kona-ba ezekusaun Orsamentu Jeral Estadu ba tinan 2025, neebe aprova husi Lei n. 8/2024, loron 26 fulan Novembru. Normas neebe hatuur iha Dekretu Lei nee bele aplika ba servisu no entidade hotu-hotu iha Subsetor Administrativa Sentral, Subsetor Seguransa Sosial no Subsetor Rejiaun Administrativa Espesial Oekusi Ambeno nian.
Prezidente Republika, Jose Ramos Horta hatutan, agora laiha dekretu lei iha nia office, buat hotu promulga hotu ona.
“Se ohin maun Boot Primeiru Ministru haruka mai ohin kedas hau promulga, hau taka matan deit asina tanba konhese tiha ona Orsamentu Jeral jeral Estadu,” katak PR, Horta.
Prezidente Republika dehan, hanesan mos OJE 2025 deputadu sira debate iha Parlamentu, PR estuda iha uma, tanba nee bainhira aprova PR konhese ona no laiha problema, tanba nee PR rasik promulga ona.
(eme)
