DILI, STLTIMORLESTE.com – Padre Domingos da Costa Alves agradese ba Primeiru Ministru (PM), Kay Rala Xanana Gusmão neebe apoia hodi loke Akademia Múzika, Dom Alberto Ricardo da Silva.
Liafuan agradesimentu nee Padre Domingos da Costa Alves hatoo bainhira akompanha husi Koordenadór, Padre Nelson da Costa Freitas halao enkontru ho Primeiru Ministru iha Palásiu Governu, Segunda (06/01/2025).
“Ami mai hodi hatoo gradese bá ajuda tomak neebé sei fo, hodi loke eskola múzika ka akademia múzika de Dom Alberto Ricardo da Silva,” katak Padre Domingos.
Nia dehan, eskola múzika nee inisiativa ida mai duni husi PM rasik, Saudozu Monsenhor Alberto Ricardo no Maestro Simão Barreto dezde tinan 2002. Sira nain tolu tau ideia hodi loke eskola múzika, sira nia promesa nee konsege duni realiza iha momentu ida nee.
Iha oportunidade nee, ekipa aprezenta katak, fasilidade ka instrumentu la sufisiente tanba estudante barak liu, nunee Primeiru Ministru aseita sei kompleta hodi bele hadia diak liu tan kualidade aprendijazen.
Xefe Governu apoia milhaun US$ 1.6 hodi estabelese eskola muzika no konstrusaun ba obra nee kuaze tinan 7, tanba enfrenta obstákulu oin-oin hanesan pandemia Covid-19, mudansa Governu no seluk tán.
Oras nee daudaun konstrusaun edifísiu iha Fatumeta, Dili, finaliza ona no inaugura ona iha loron 06 Dezembru 2024, daudaun hahú matrikula. La limita idade, hakarak aprende múzika bele bá rejistu, tanba daudaun ne’e iha ona estudante nain 30 resin mak aprende múzika, hanesan toka violinu, piano no seluk tán.
(gui)
