DILI, STLTIMORLESTE.com – Primeiru Ministru (PM), Kay Rala Xanana Gusmão fo apoiu masimu ba empreza Finder Energy neebe hamutuk ho Timor GAP sei ezekuta projetu produsaun mina iha kampu ho naran “Kuda Tasi ” neebe totalmente iha area tasi Timor nian.
Empreza rua nee sei hahu halo produsaun iha inísiu tinan 2027 ho estimasaun milhaun 25/barir, neebe iha faze dahaluk sei produs too tinan 9 no bele kontinua.
Diretor Ezekutivu Empreza Finder Energy, Damon Neaves atualiza ona novidade nee ba Primeiru Ministru (PM), Kay Rala Xanana Gusmão, iha Palasiu Governu, Kinta (05/03/2026).
“Hasoru Primeiru Ministru hodi atualiza kona-ba ami nia projetu neebe lokaliza iha tasi, no sei halo produsaun ba kampu ho naran Kuda Tasi iha tinan 2027. Orgulhu tebe-tebes hasoru Primeiru Ministru hodi hatoo programa ida nee no iha esperansa bá oin ami nia kompanhia bele servisu hamutuk ho Governu hodi hahú produsaun,” Damon Neaves hateten liu husi komunikadu imprensa neebe STL asesu husi media GPM.
Foin lalais empreza nee hamutuk ho parseiru Timor GAP sosa roo neebe sei utiliza ba prosesamentu mina. Roo nee rasik sei iha Europa no sei mai hodi hahu produsaun ba posu mina ida iha tinan 2027.
Lokalizasaun posu mina Kuda Tasi 100% iha area Timor Leste neebe sei fo servisu bá Timoroan sira. Kompanhia produtor no trabalhador neebe servisu sei selu taxa ba Estadu TL.
“Primeiru Ministru apoia tebe-tebes projetu neebe iha area eskluzivu TL nian. Estudu halo tiha ona no sei halo produsaun iha 2027,” nia atualiza.
Finder Energy Holdings Limited estabelese iha tinan 2004 ho nia sede iha South Perth, Australia, nuudar esplorador mina no gas neebe susesu no provadu.
Finder harii ona karteira area substansial ida husi lisensa esplorasaun nian neebe prospetivu tebes iha basia hidrokarbonetu prinsipal rua iha mundu mak hanesan Plataforma Norte Oeste Australia ho Tasi Norte Reinu Unidu.
(alb)
