DILI, STLTIMORLESTE.com – Primeiru Ministru (PM), Kay Rala Xanana Gusmao atualiza proposta planeamentu no Orsamentu Jeral Estadu (OJE) 2026 neebe Komite Revizaun Orsamentu (KRO) halao hela diskusaun iha Ministeriu Finansas (MF) ba Prezidente Republika, Jose Ramos Horta hodi tetu.
Primeiru Ministru (PM), Kay Rala Xanana Gusmao hatete, KRO diskute fo atensaun makaas atu aloka orsamentu tuir programa no tenke ezekuta ho diak, tanba nee osan povu nian.
“Fundu Petroliu menus ba daudaun, Bayu Undang taka ona iha fulan Junhu 2025, neebe tenke haree balu nee dehan halo buat hotu la diak, maibe 2024 mos hatudu kbiit atu ezekuta laiha, 2025 fo menus liu mos kbiit laiha, ba 2026 husu hanesan nee neebe hau esplika ba Prezidente Republika,” dehan PM, Xanana ba jornslista sira hafoin remata enkontru ho PR iha Palasiu Prezidensial, Nicolau Lobato, Bairo Pite, Kinta (14/08/2025).
Xefe Governu dehan, iha hasoru malu, Prezidente Republika Jose Ramos Horta husu Primeiru Ministru atu servisu diak ho pasiensia no augenta, tanba ida nee atu konsolida estadu no prepara ema, ikus mai gasta osan ho diak hodi hanoin povu nee nia moris.
Iha fatin hanesan, Prezidente Republika Jose Ramos Horta hatete, fila husi Australia mai hasoru malu kedas ho Primeiru Ministru, Kay Rala Xanana Gusmao.
“Fila mai hasoru malu kedas ho Primeiru Ministru, mezmu kolen, tanba revizaun orsamentu primeiru hodi haree mos revizaun orsamentu Prezidensia nia, Governu hatun orsamentu ba ministeriu hotu-hotu inklui Prezidensia hatun makaas ba Prezidensia nian milhaun US$ 4 ka milhaun US$ 5, hau la satia ho ida nee, tanba hau komprende, hau hatete ba maun boot iha 2022, 2023, 2024, 2025 viajen internasional lubuk ida para tau Timor iha mundu, agora ita iha neebe ema kuaze hatene Timor lider bobot komesa mai, Primeiru Ministru Malazia mai iha 16, 17 Outubru, Primeiru Ministru Singapura komfirma mai iha 2025 ita tama iha ASEAN Outubru,” dehan Prezidente Republika.
Prezidente Republika hatete, ho orsamentu tinan 2026 bele koa orsamentu Prezidensia Republika 50% laiha problema, tanba iha 2026 viajen iha nasaun ASEAN deit.
“Hau hatete 2026 viajen Prezidente Republika bele tun 50% mos laiha problema, 2026 hau sei konsentra liu viajen iha rai ASEAN sira, tanba ita ASEAN agora tenke presta atensaun loloos, entau viajen mak iha ASEAN ba Australia, Indonezia no Malazia, besik-besik nee para kolabora ho Governu, se Governu hakarak hatun orsamentu laiha problema no bele hatun mos atividade seluk hanesan atividade sosial umanitariu,” katak PR , Horta.
(eme)
