DILI, STLTIMORLESTE.com – Primeiru Ministru (PM), Kay Rala Xanana Gusmão viajen ba Malázia hodi partisipa simeira Association of Southeast Asian Nations (ASEAN) ba dala-46.
Liu husi Komunikadu neebe STL asesu husi Media GPM katak, Primeiru Ministru (PM) Kay Rala Xanana Gusmão nia prezensa lori Timor Leste (TL) nia naran hanesan observador iha eventu altu nível neebe sei halao iha Kuala Lumpur, Malazia, hahu husi loron 23 too 27 Maiu 2025. Depois programa nee inklui Simeira daruak Konselhu Kooperasaun ASEAN-Gulfu (GCC) no Simeira dahuluk ASEAN–GCC-Xina.
Iha simeira Primeiru Ministru Kay Rala Xanana Gusmão mak lidera delegasaun altu nível ida neebe kompostu husi Visi Primeiru Ministru no Ministru Koordenador ba Asuntu Ekonomiku, Francisco Kalbuadi Lay, Ministru Negósiu Estranjeiru no Kooperasaun (MNEK), Bendito dos Santos Freitas, Visi Ministru ba Asuntu Parlamentár, Adérito Hugo da Costa, Visi Ministra ba Asuntu ASEAN nian, Milena Rangel, Visi Ministru bá Komersiu, Augusto Júnior Trindade no Sekretariu Estadu Komunikasaun Sosiál, Expedito Dias Ximenes.
Reprezentasaun neebe forte nee hatudu Timor Leste nia kompromisu kontínua hodi hametin kooperasaun rejional no prosesu integrasaun ASEAN nian.
Entretantu durante partisipasaun iha simeira nee, Xefe Governu sei hamutuk ho líder sira husi Estadu membru ASEAN, nasaun sira Golfu nian no Xina hodi partisipa ativa iha diskusaun altu nível sira kona-ba asuntu xave rejional no global.
Primeiru Ministru sei halao mos enkontru bilateral ho omólogu husi Estadu membru sira inklui partisipa iha eventu sekundariu sira ho objetivu atu aprofunda kooperasaun no hametin lasu rejionál.
Simeira ASEAN ba dala-46 fo plataforma ida neebe iha valor ba Timor Leste hodi kontribui bá diskusaun sira kona-ba kestaun polítika, ekonomika no seguransa neebe afeta rejiaun nee.
Antes simeira, sei halao enkontru preparatóriu lubuk ida inklui enkontru preparatóriu sira ASEAN nian SOM-GCC-Xina, enkontru Komité Reprezentante Permanente sira-nian (CPR), Enkontru Ofisial Superior sira ASEAN nian (SOM), Reuniaun Preparatóriu Ofisial Ekonómiku Superiór sira ASEAN nian (SOM), enkontru Ministru Negosiu Estranjeiru sira ASEAN nian (AMM), Reuniaun Konsellu Koordenasaun ASEAN (ACC) ba dala-36, Reuniaun Konsellu Komunidade Polítika no Seguransa ASEAN ba dala-29, Reuniaun Konselhu Komunidade Ekonómika ASEAN (AECC) ba dala-25 no Enkontru Ministerial ASEAN-GCC.
Timor Leste hatoo sinseru agradesimentu ba Estadu-membru ASEAN nian ba apoiu kontinua iha prosesu adezaun tomak, liu-liu hodi kumpre marku sira neebe hatuur ona iha Roteiru ba Adezaun Plena Timor Leste nian iha ASEAN.
Timor Leste re-afirma kompromisu atu kumpre obrigasaun no kriteriu sira neebe nesesariu ba ninia integrasaun tomak iha futuru iha bloku rejional.
Governu Timor Leste hatoo apresiasaun ba Malázia nuudar nasaun neebe asume Prezidénsia ASEAN nian iha tinan 2025 ho tema “Inkluzividade no Sustentabilidade” no dezeja mandatu susesu ba Malázia, hein atu kolabora iha inisiativa sira neebe promove dezenvolvimentu inkluzivu no sustentavel iha rejiaun.
Timor Leste hein atu partisipa ativamente iha simeira sira no haburas kooperasaun signifikativa ho parseiru sira iha espíritu solidariedade rejional no benefísiu mutuo.
Tuir informasaun, Primeiru Ministru Kay Rala Xanana Gusmão ho delegasaun sei too hikas Dili iha 28 maiu tinan 2025.
(jen)
