ERMERA, STLTIMORLESTE.com – Primeiru Ministru (PM), Kay Rala Xanana Gusmão dezafia ekipa “Mama Bolu” ho ekipa Virnie Unip. LDA atu kontinua sira nia misaun karidade hanesan fo apoiu nesidade bázika no harii uma dignu ba populasaun kbiit laek sira iha área rural.
Xefe Governu dezafia nee durante hasoru malu ho ekipa “Mama Bolu”, lideradu husi atual Komandante Unidade Patrulhamentu Fronteira (UPF), Superintendente, Euclides Belo, Rudy Kuag, Nunu Saldanha, Januário Baptista no “Amudai”, Checha Chatacha iha rezidensia Amutin, Dili, Sabadu (08/02/25).
“Saida mak imi halo nee laos tan dever, maibé ho fuan, imi hotu fuan diak no kontinua nafatin imi nia asaun diak sira, konta ho ha’u nia apoiu,” PM Xanana hateten ba ekipa mama Bolu, liu husi komunikadu neebe STL asesu husi media Gabinete Primeiru Ministru.
Xefe Governu konsidera asaun lolo liman, kari domin bá ema hirak neebe presiza tenke sai kultura bá Timoroan sira. Tanba Timor Leste povu barak sei moris iha situasaun mukit neebe presiza asaun domin hanesan ekipa Mama Bolu halao ona durante nee.
Xefe Governu agradese, durante periodu Covid-19 invade mundu no Timor Leste, ekipa “Mama Bolu” halo misaun importante oin-oin iha Dili too munisipiu sira.
Iha fatin hanesan, Euclides Belo agradese ba motivasaun husi Maun Boot Xanana no promete sei kontinua misaun ajuda Timoroan hirak neebe presiza hetan tulun.
Durante nee ekipa Mama Bolu konstrui uma bá komunidade iha Batugade, apoia ekipamentu ba Movimentu Brigada Xanana (MBX) harii kapela ba sarani sira iha Lore-Lautem no fatin seluk tan.
(alb)
