DILI, STLTIMORLESTE.com – Primeiru Ministru (PM), Kay Rala Xanana Gusmão ho Arsebispu Arkedioseze Metropolitana Dili, Dom Virgilio Kardeal do Carmo da Silva, SDB halo inaugurasaun edifisiu Papa Francisco iha Universidade Católica Timorense (UCT).
Iha biban nee, PM Kay Rala Xanana Gusmão liu husi nia diskursu iha UCT Kuarta kalan (19/03/2025) hatete, sente haksolok hodi partisipa serimonia inaugurasaun edifisiu UCT neebe reprezenta progresu ba instituisaun akademiku importante nee.
“Ho ksolok tebes hau partisipa iha serimonia inaugurasaun edifísiu foun UCT, neebe reprezenta laos deit progresu liu tan ba instituisaun akademika importante ida nee, maibe mos ba sistema ensinu superior Timor Leste nian,” dehan PM Xanana.
PM dehan, nia sente ho laran haksolok, bainhira UCT hili naran edifisiu nee naran edifisiu Papa Francisco.
“Hau aproveita oportunidade ida nee atu repete hau nia orasaun atu Sua Santidade Papa Francisco kontinua haree melhoria iha ninia saude,” katak Xanana.
Xefe Governu hatete, iha fulan Setembru tinan kotuk Sua Santidade Papa Francisco nia vizita, ida nee mak momentu ida neebe labele haluha husi povu no hein katak ida nee hanesan inspirasaun ida neebe sei dura, liu-liu ba joven sira.
Amu Papa Francisco hanorin fundamental barak fo hanoin kona-ba importansia Fraternidade Umana”, Timor Leste apoia unidade no valor sira dame nian, entre relijiaun sira, neebe importante tebes atu rezolve violensia.
“Ema idak-idak nia relijiaun, maske iha fiar no fiar neebe la hanesan tenke sai pratika buat diak nian, hau fiar katak ida nee mak valor ida neebe transmite iha instituisaun edukativa ida nee, neebe fo mai ita esperansa no konfiansa ba futuru ida neebe diak liu, neebe harii ho partisipasaun konsiente no kualifikada husi ita nia foinsae sira,” dehan PM.
Nunee mos Arsebispu Arkedioseze Metropolitana Dili, Dom Virgilio Cardeal do Carmo da Silva, SDB lori dioseze nia naran nomos nuudar fundasaun São Paulo II nia, hakarak fo benvindu ba parte hotu, liu-liu Primeiru Ministru nomos parte hotu neebe mak ho laran ksolok hodi halo inaugurasaun edifisiu Papa Francisco UCT.
“Liu-liu Primeiru Ministru kay Rala Xanana Gusmão ba domin no laran luak no preokupasaun hotu neebe durante nee kuu hela ami ho maneira oin-oin no ami sente ida nee hanesan aman ida, maun ida neebe dehan ba ami kualidade,” dehan Kardeal.
Dom Virgilio hatete, sira harii universidade laos ambisaun, tinan 20 liu ida neebe mak Dom Belo rasik maibe la konsege tuir mai Dom Norberto mos iha inisiativa maibe mosu problema.
“Problema neebe hau bele esplika, no nia husik hela edifisiu neebe hahu primeiru pedra harii besi no hau mos lakohi, no hau la mehi mos atu kontinua, hau hatene katak laos fasil atu harii universidade ida maibe la oho tempu hotu ikus mai ohin enkoraja ami hakmatek oituan husi voluntariu lubuk ida husi leigos lubuk ida no sira mak fera ulun tau hamutuk hanoin fulan ida hotu sira dehan buat hotu prontu ona ita lori ba, sira mak hakerek no sira mak fera ulun hau lori dokumentus ba, no mai hau deside Amu Joel sai Reitor laiha osan, maibe banku mak providensial,” katak Kardeal.
Dom Virgilio mos hatoo agradese ba VIII Governu too IX Governu neebe sempre tau matan ba universidade nee ho sira nia jenorisidade ho maneira oin-oin ho objetivu hakarak harii duni UCT.
“Ita boot sira mak hakarak duni harii, hau kontinua konta ho ita boot sira nia hanoin tomak, tanba ida nee laos bispu ida nia, amu lulik ida nia, maibe ba povu no sarani sira nia,” katak nia.
Nunee mos Reitor UCT, Padre Joel Casmiro Pinto hatutan, ohin dia 19 Marsu loron São José nia loron festa ba Sua Eminensia Dom virgilio Cardela do Carmo da silva, SDB ninia episkopadu, maibe aproveita momentu ida nee UCT hakarak inaugura edifisiu Papa Francisco nia.
“Edifisiu ida nee finansia husi Governu RDTL no ami harii parte boot ida husi parte sorin neeba bibleoteka parte sorin salaun ida primeiru no segundu pizu nee iha laboratoriu ba medisina, biolozika, Kimika, Fizika, ba lingua, ba dansa sira mos iha hotu, arte nia oinsa sira halo drama nomos sira husi komunikasaun hakarak halo video ka filme sira aproveita,” dehan Reitor.
Nomos iha pizu dala tolu nee iha sala de aula deit, nee didika ba medisina fakuldade siensia medika iha neeba medika jeral iha informajen nomos iha farmasia.
Aleinde nee edefisiu neebe mak ohin halo inaugurasaun ho montante orsamentu hira? No orsamentu nee husi neebe, hatan ba kestaun nee reitor dehan, orsamentu gastu ba edifisiu nee US$ 2.4 milhões, laos bazeia ba forsa UCT nia laiha no seidauk too iha neeba, karik too aban bainrua maibe momentu nee, no apoiu nee primeiru mai husi Governu, nomos Arkedioseze rasik mos iha apoiu.
(eme)
