AMBENO, STLTIMORLESTE.com – Primeiru Ministru (PM), Kay Rala Xanana Gusmão dehan, durante nee Autoridade Rejiaun Administrativa Espesial Oekusi-Ambeno abandona dezenvolvimentu ba Postu Administrativu Nitibe, Pasabe no Oesilo.
“Ami nia observasaun durante dialogu ho komunidade sira iha Nitibe, Pasabe no Oesilo liu husi dialogu kona-ba IX Governu Konstitusional atu aplika Governu desentralizasaun administrasaun no poder lokal, observa katak dezenvolvimentu infraestrutura hanesan estrada, bee moos laiha,” dehan PM Xanana Gusmão bainhira halao dialogu ba loron da haat ho komunidade Postu Administrativu Pantemakassar iha Otel Oeupu, Sesta nee (02/05/2025).
Tanba nee husu atensaun ba Autoridade RAEOA ho Oekusi oan sira neebe daudaun nee hetan fiar atu kaer ukun, labele hanoin atu manan osan Estadu kada fulan, maibe tenke servisu ba povu ho dezenvolvimentu.
“Hau husu ba funsionariu publiku sira hotu neebe servisu iha instituisaun Estadu, tenke servisu ba povu, laos hanoin atu kada fulan simu deit osan Estadu maibe la halo servisu, realidade durante nee iha area rurais iha Oekusi laiha dezenvolvimentu. Hau husu atu valoriza inan aman neebe katuas ona, sira mak eroi ba rai Timor, ohin sira fuk mutin hotu ona no isin krekas ona, sira luta ba rai ida nee hodi liberta rai Timor, barak mak mate, fakar raan no ruin naklekar iha fatin-fatin, ohin hetan ona independensia tenke valoriza sira nia sakrifisiu ho dezenvolvimentu,” dehan nia.
Nia dehan, dialogu nee husu ba sira neebe kaer ukun atu halo reflesaun, tanba saida mak dezenvolvimentu Oekusi-Ambeno akontese deit iha Pantemakassar maibe abandona Postu Administrativu Nitibe, Pasabe no Oesilo.
Iha biban nee, Jestor Postu Administrativu Pantemakassar, Francisco da Cunha hatoo benvindu ba PM Xanana neebe mak ohin mai hamutuk ho povu atu halao dialogu ho povu tomak iha Oekusi, liu-liu Postu Administrativu Pantemakassar.
“Moto IX Governu Konstitusional lideradu husi Primeiru Ministru (PM), Kay Rala Xanana Gusmão dehan, ita labele husik ema ida ba kotuk iha prosesu dezenvolvimentu,” dehan nia.
Tuir observasaun STL iha dialogu loron da haat neebe realiza iha Otel Oeupu, Suku Costa, Postu Administrativu Pantemakassar kapital Oekusi, Jestor Postu Administrativu Pantemakassar ho Xefe Suku sira simu PM Xanana ho hatais tais Oekusi, lia dadoli (Takanan), tebe tradisional (Bsoot), Bidu husi labarik sira, tara tais mak tama ba fatin serimonia iha Otel Oeupu no halao dialogu ho povu kapital Oekusi.
(jos)
