DILI, STLTIMORLESTE.com – Primeiru Ministru (PM), Kay Rala Xanana Gusmão halao enkontru ho Grupu Trabalhu Prosesu Rekonsiliasaun Timoroan iha salaun Sentru Nasional Chega, Empreza Publiku (CNC, E.P) Balide, Dili, Tersa (08/04/2025).
PM Xanana akompanha husi Visi Ministru ba Asuntu Parlamentares, Aderito Hugo da Costa too iha CNC, iha tuku 09:10, simu husi Diretor Ezekutivu CNC, Hugu Maria Fernandes ho tara tais no kontinua vizita edifisiu CNC, kafe dadersan mak tama iha Salaun konferensia CNC, antigu komarka Balide, hodi hahu enkontru ho Grupu Trabalhu Prosesu Rekonsiliasaun Timoroan neebe naktaka ba publiku.
Iha oportunidade nee, Diretor Ezekutivu CNC, Hugu Maria Fernandes hatoo benvindu ba PM Xanana mai CNC atu halo enkontru ho Grupu Trabalhu Prosesu Rekonsiliasaun Timoroan.
Hafoin Ida nee, PM Xanana Gusmão ofisialmente abertura enkontru nee ho Grupu Trabalhu Prosesu Rekonsiliasaun Timoroan ho dere mic dala tolu, nunee enkontru nee hahu no naktaka ba publiku durante enkontru nee lao, tanba nee remata enkontru mak media STL sei konfirma kona-ba rezultadu enkontru nee.
Tuir informasaun neebe STL asesu husi Muster of Cerimony (MC) iha enkontru nee katak, durante nee hakat ona prosesu lubuk ida liga ho asuntu rekonsiliasaun nian, gahu husi Komisaun Akolhementu Verdade no Rekonsiliasaun (CAVR) iha tinan hirak liu ba, Organizasaun Rezistensia hamutuk ho CNC nomos Organizasauan Sosiedade Sivil hahu ho festival Fronteira iha tinan 2022 iha Maliana, depois iha tinan 2023 hahu fali iha Rejiaun Administrativu Espesial Oekusi-Ambeno (RAEOA). Iha RAEOA hasai Deklarasaun ida neebe importante tebes-tebes hodi involve organizasaun sira hotu-hotu ba prosesu rekonsiliasaun Timoroan.
“Ohin ita marka tan pasu ida, hafoin ita halao enkontru ba dala 3 ba estabelesimentu Grupu Trabalhu nee, ohin ita marka tan pasu ida, hetan oportunidade diak tebes, Grupu Trabalhu ida nee, bele halo dialogu direitamente ho PM Kay Rala Xanana Gusmão kona-ba asuntu rekonsiliasaun,” dehan MC iha ninia liafuan abertura ba enkontru ho Grupu Trabalhu Prosesu Rekonsiliasaun Timoroan.
Tuir observasaun STL iha CNC, enkontru nee taka ba publiku, nunee hornalista sira husi media emprime no eletroniku kontinua hein rezultadu enkontru nee hodi desimina informasaun ba publiku kona-ba enkontru husi Grupu Trabalhu Prosesu Rekonsiliasaun Timoroan neebe prezide husi PM Kay Rala Xanana sai hanesan orador prinsipal iha enkontru nee.
(jos)
