DILI, STLTIMORLESTE.com – Primeiru Ministru (PM), Kay Rala Xanana Gusmão entrega sertifikadu apresiasaun ba embaixador ekonomia azul nain 14, iha salaun enkontru Gabinete Fronteiras Terrestres no Marritimas.
Joven nain 14 nee, Gabinete Fronteiras Terrestres no Marrítimas konsidera hanesan embaixador ekonomia azul, tanba partilha informasaun ba populasaun kona-ba protesaun ambiental liu-liu proteje tasi husi plastiku durante semana mundial Oseanu 2025.
Primeiru Ministru, Xanana Gusmão husu joven hirak nee atu kontinua hatoo informasaun ba populasaun liu-liu joven sira nunee proteje biodiversidade tomak.
“Kontinua nafatin atividde nee, laos deit ba komunidade maibe mos ba joven sira tanba tasi importante tebes-tebes iha ita-nia vida tomak. Tasi mak fo oksijeniu ba ita ema, labele estraga,” hatete PM Xanana liu husi nota komunikadu neebe STL asesu husi media Gabinete Primeiru Ministru, Kinta (12/06/2025).
Iha fatin hanesan, Diretora Ezekutivu Gabinete Fronteiras Terrestres no Marritimas atual Xefe Gabinete Primeiru Ministru, Elizabeth Exposto agradese ba esforsu husi joven nain 14 neebe durante Semana Mundial Oseanu 2025 husi loron 01 too 08 Junhu 2025 konsiensializa populasaun atu labele soe plastiku arbiru.
Elizabeth Exposto informa, tinan kotuk iha joven nain 38 tuir formasaun kona-ba ekonomia azul neebe Governu mak organiza, joven sira nee sai mos portavoz ba joven sira atu prezerva no konserva tasi Timor.
“Durante semana mundial Oseanu, sira nain 14 ba Munisipiu Manatuto, Atauro, RAEOA, Ainaro no Luatem hodi realiza seminariu kona-ba labele soe plastiku ba ita nia tasi. Sira voluntariu hodi aumenta konesimentu populasaun lokal
Ita fo apresiasaun no rekonese mos sira nia servisu,” Elizabeth Exposto hateten.
Joven nain 14 nee kompromete atu kontinua fahe informasaun ba publiku liu-husi arte hodi asegura lixu iha rai-maran no kuidadu ambiente tasi ho atividde konsensializasaun sidadaun atu soe lixu iha lixeira.
(alb)
