DILI, STLTIMORLESTE.com – Primeiru Ministru (PM), Kay Rala Xanana Gusmão felisita Prezidente eleitu Estadus Unidus Amérika (EUA), Donald J. Trump.
Felisitasaun nee Primeiru Ministru Xanana Gusmão hatoo liu husi karta ofisial ho numeru 209/PM-GPM/X1/2024 iha Díli, 7 Novembru 2024.
“Karru Prezidente eleitu Trump, lori Governu no povu Timor Leste nia naran, aprezenta hau nia sinsera felisitasaun ba ita nia vitoria abranjente iha eleisaun prezidensiais,” Xanana Gusmão hatete liu husi nota komunikadu neebe STL asesu husi media Gabinete Primeiru Ministru, Segunda (11/11/2024).
Primeiru Ministru konsidera vitoria eleitoral Trump nian refleta apoiu no konfiansa neebe povu Amerikanu depozita ba ninia lideransa no politika ba ninia nasaun.
EUA ho Timor Leste iha relasaun amizade ida neebe forte tebes no kooperasaun forte bazeia ba respeitu mutua ba valores, kompromissu no prinsipiu sira demokratiku.
Nasaun rua servisu hamutuk ona nuudar parseiru neebe iha kooperasaun ida neebe fo ona kontribuisaun signifikativa ba dezenvolvimentu Timor-Leste nian no envolvimentu internasional.
Xanana Gusmão fiar katak, Trump ninia lideransa sei hametin liu tan kooperasaun entre nasaun rua, sei promove liu tan kolaborasaun iha area interesadu sira.
Governu Timor Leste iha esperansa bele servisu hamutuk ho Prezidente eleitu no Governu Amerikanu nian, atu bele atinje objetivu komun ida no bele hakle’an liu tán relasaun bilaterál.
Xefe Governu hatoo votu susesu ba mandatu Trump nian no votu prosperu ba povu no nasaun Estadus Unidus Amerika (EUA).
(alb)
