DILI, STLTIMORLESTE.com – Primeiru Ministru (PM), Kay Rala Xanana Gusmão hamutuk ho Ministra Solidariedade Sosial no Inkluzaun (MSSI), Veronica das Dores, Visi MSSI Ceo Brites, Ministra Saude Elia A. A. dos Reis Amaral ho Prezidente Institutu Nasional Seguransa Sosial (INSS), Arlindo Pinto ofisialmente halao lansamentu Mobile App neebe organiza husi INSS ho dere babadok.
Serimonia lansamentu Mobile App nee hahu ho simu PM Xanana ho tara tais husi MSSI, Veronica das Dores ba PM Xanana, kontinua kedan ho orasaun neebe prezide husi Pe. Nico, nunee kanta Hino Nasional patria-patria, 1 minutu silensiu diriji husi Xefe Governu kontinua kedan ho diskursu.
PM Xanana iha ninia diskursu iha serimonia Lansamentu Mobile App nee dehan, loron ohin importante duni, liu-liu ba hotu-hotu neebe kontribui ba seguransa sosial ba sira nia aan rasik nomos ba sira nia familia.
“Ida nee forma ida neebe ita halo, prestasaun servisu neebe ita halo hodi hakbesik aan ba ema idak-idak, trabalhador sira no servisu publiku inklui servisu privadu, hodi sira bele hetan garantia, daudaun nee iha saida para sira nia futuru bainhira hetan aprezentasaun ou sai husi husi sira nia servisu,” dehan PM Xanana liu husi ninia deskursu iha serimonia lansamentu Mobile App INSS iha salaun Multifunsaun Bebora, Dili, Tersa (08/04/2025).
Iha biban nee, PM Xanana hatoo obrigadu wain ba ema hotu-hotu, tanba bele fo disponibilidade tempu hodi partisipa iha serimonia lansamentu Mobile App INSS, fo konfiansa boot ba trabalhador sira, tantu sira neebe servisu iha instituisaun publiku no privadu.
Iha oportunidade nee, MSSI, Veronica das Dores liu husi ninia deskursu, agradese ba Nai Maromak, ondra no Gloria ba Eroi no martires sira, neebe sira nia sakrifisiu tomak hodi sosa independensia ba rai doben TL.
IX Governu Konstitusional, liu husi MSSI no INSS ninia kompromisu boot tebes, hodi hadia prestasaun servisu no atendimentu seguransa sosial ba sira kontribuinte sira nomos non kontribuintes sira.
“Ohin loron MSSI no INSS, laran orgulhu tebes, konvida ita boot sira hodi partisipa iha serimonia Lansamentu Mobile App INSS, atu marka tan istoria foun ba IX Governu Konstitusional ba kontribuisaun husi setor publiku no privadu sira fo kontribuisaun liu husi Seguransa Sosial neebe sei proteje ita nia aan rasik, familia no publiku,” dehan Ministra Veronica.
Iha oportunidade nee, Prezidente INSS-FRSS, Arlindo Pinto liu husi ninia deskursu, agradese ba Maromak tanba MSSI liu husi INSS hakat tan pasu ida importante, lansamentu Mobile App INSS iha tinan 2025.
“Ita agradese ba Maromak, tanba hakat tan pasu ida importante ba ita nia sidadania sira neebe mak durante nee kontribui ba seguransa sosial iha ita nia rai Timor Leste (TL). Seguransa sosial nuudar sistema bele asegura direitu umanu atu proteje sidadaun hotu-hotu hodi garante bem estar moris dignu nian, tanba seguransa sosial proteje ita neebe sei moris, liu husi subsidiu abilidade ita moris too hakoi ita mate liu husi pensaun sosial, inklui pensaun reforma pensaun sosial,” dehan Prezidente INSS-FRSS, Arlindo Pinto liu husi ninia diskursu.
Nia haktuir tan katak, kompromisu husi INSS mak halo jestaun diak, transparensia no efikasia liu husi jestaun fundu ba seguransa sosial nomos jestaun diak ba sidadaun sira hotu. Iha tinan kotuk liu ba MSSI konsege lansa kona-ba transparansia no lansamentu ba seguansa sosial ninian, ba sidadaun hotu-hotu neebe durante nee kontribui ba seguransa sosial liu husi taxa kontribuisoens husi trabalhador 4% no empregadores 6%.
“Agradese ba ekipa IT neebe konsege dezenvolve mobile App, durante nee servisu makaas hodi dezenvolve, too ohin loron sira bele atinje iha tempu neebe mais fasil, parabens ba ita boot sira, fiar katak ita Timor mos bele. Ho Seguransa sosial mai kontribui salva ita nia futuru,” afirma Prezidente INSS-FRSS.
INSS estabelese iha tinan 2017 liu husi dekretu lei numeru 47/2016 iha dia 14 de Fevereiru, bazeia ba lei No.12/2026 de 14 de Novembru kona-ba lei mitigasaun rejime kooperasaun sosial, ho misaun mak atu halo jestaun, ezekuta sistema seguransa sosial no inklui jestaun orsamentu segurans sosial ba setor publiku nomos setor privadu iha TL.
IX Governu Konstitusional kompremetivu atu kontinua estabelese servisu ba publiku nomos ba povu iha setor 3 mak ohin loron realiza iha tinan 2025 liu husi MSSI ho INSS, hakat tan pasu ida ba oin tan, konvida ita hotu ba lansamentu ba sistema aplikasaun Mobile App iha INSS, ho objetivu atu hakbesik aan ba povu no publiku liu husi prestasaun servisu ho fasil no simples, liu-liu ba membru governu sira neebe durante nee tuir sistema siguransa sosial sei hatene kona-ba sira nia taxa kontributivu valor 4% no ba taxa empregador sira ho 6%, nunee mos ba maluk sira neebe mak loke kampu trabalhu ba sira nia aan rasik ka setor formal ho 10%.
(jos)
