DILI, STLTIMORLESTE.com – Primeiru Ministru (PM), Kay Rala Xanana Gusmão responde ka hatan pergunta husi Deputada Bankada FRETILIN, Maria Anabela Sávio neebe sadik Primeiru Ministru (PM), Kay Rala Xanana Gusmão atu esplika ba publiku kona-ba kazu roo Haksolok neebe gasta osan barak, maibe roo nee seidauk mosu mai hodi fo haksolok ba povu sira.
Nunee Xanana dehan, se nia asina sei responsabilidade, tanba ohin ho horiseik, Deputada balu ezije loos atu responde.
“Hau atu responde ba roo Haksolok, maibe hau atu dehan katak, roo Haksolok nee ita boot lalikan preokupa, tanba ita boot deit mos dehan hau mak asina, neebe preokupa halo saida. Se hau mak asina entaun hau mak sei responsabilidade” katak PM, Xanana iha debate proposta OJE 2025 iha PN, Sesta (08/11/2024 ).
Iha fatin hanesan, Deputada Bankada PD, Maria Teresa Gusmão hatete, kona-ba prosesu ba sosa roo Haksolok lidera duni husi Primeiru Ministru (PM), Xanana Gusmão asina husi Ministru Pedro Lay, maibe too ohin loron sai kestaun ba ema hotu, atu dehan katak osan ba pagamentu fo, maibe irresponsabilidade husi Mari Alkatiri, iha momentu neeba, tanba roo Haksolok seidauk mai.
Tuir nia, iha VIII Governu aloka tan orsamentu ba roo Haksolok, momentu neeba PM la envolve iha ukun, iha momentu neeba promete ketak data fulan no tinan iha kedas, nunee roo Haksolok mai husi Portugal. Tanba pagamentu hotu ona hein roo nee atu mai, maibe tanba saida mak seidauk mai.
Nia dehan, kestaun simples pagamentu hotu ona, maibe roo nee tanba saida mak la mai. Tanba nee Bankada FRETILIN la labele husu ba Primeiru Ministru, Xanana, maibe husu ba Sekretariu Jeral Partidu FRETILIN mak bele hatene hatan.
Hatan ba kestaun nee Deputada Bankada FRETILIN, Anabela Sávio hatete, kona-ba roo Haksolok nee laos Sekretariu Jeral Partidu FRETILIN, Mari Alkatiri nia privadu, tanba nee husu ba Governu neebe ukun, se hakarak roo Haksolok mai tau osan. Tanba nee husu Primeiru Ministru, Xanana atu hatan.
(gui)
