DILI, STLTIMORLESTE.com – Primeiru Ministru (PM), Kay Rala Xanana Gusmão husu Embaixador Timor Leste (TL) ba Kambodia, Marcos dos Reis da Costa atu kontinua hametin kooperasaun bilateral entre nasaun rua.
Xefe Governu husu nee durante halao reuniaun ho Embaixador Timor Leste ba Kambodia, Marcos da Costa iha Palasiu Governu, Kuarta nee (18/06/25).
“Parabens ba ita nia knaar foun. Hau husu ita kontinua hametin nafatin kooperasaun Timor Leste ho Kambodia no kontinua haree mos kooperasaun ho nasaun membru ASEAN,” hatete PM Xanana Gusmão.
Iha fatin hanesan, Marcos dos Reis da Costa agradese ba Xefe Governu neebe hatoo mensajen klara kona-ba programa IX Governu Konstitusional nian definidu iha polítika esterna Timor nian ho prinsipiu ida neebe konsagra sentidu independeensia mak: “Ba Timor Leste, Laiha Aliadu Ka Inimigu, Hotu-Hotu Sei Hamutuk no AMIGUS Deit!”.
Ida nee sai hanesan lema Timor nian neebe sei orienta ba relasaun esterna nian, iha konjuntura internasionaal ida neebe daudaun nee difisil tebes.
“Hau mai enkontru ho lider nasional Xanana Gusmão hanesan Xefe Governu, atu husu orientasaun politika hanesan Embaixador hodi halao misaun iha nasaun Kambodia. Primeiru Ministru dejeza susesu ba servisu iha neeba hodi mantein relasaun bilateral Timor-Leste no Cambodia. Alende nee haree liu-tan ba fortalesimentu kooperasaun neebe ita estabelese ho Kambodia liu-liu ba kestaun atu sai membru ASEAN nian,” Marcos dos Reis hateten.
Tuir planu iha primeira semana fulan Julhu 2025, Embaixador Marcos sei arranka ba Kambodia.
Marcos dos Reis da Costa simu pose husi Prezidente Republika no Laureadu Nobel ba Pas, Jose Ramos Horta nuudar Embaixador Estraordinariu no Plenipotentiariu Republika Demokratika Timor Leste ba Reinu Kambodia iha Palasiu Prezidente Nicolau Lobato (09/06/2025).
Embaixador Marcos lori esperiensia diplomatika distintu-liu dekada rua ba nomeasaun istoriku ida-nee. Nia hola parte iha joven diplomata nain 50 dahuluk neebe rekruta hodi estabelese Ministeriu Negosiu Estranjeiru Timor Leste nian iha tinan 2000 no ofisialmente hahu iha independensia tinan 2002.
Agora daudaun halao knaar nuudar Diretor Jeral ba Asuntu Bilateral sira ba Azia no Oseania iha Ministeriu Negosiu Estranjeiru no Kooperasaun hahu husi Agostu 2023.
Durante karreira, nia servisu iha postu diplomatiku xave sira inklui Segundu Sekretariu iha Malazia, Primeiru Sekretariu iha Gabinete ONU nian iha Genebra, no Konselleiru iha Jakarta. Nia iha Mestradu Ezekutivu Relasaun Internasional sira husi Eskola Diplomasia Genebra nian.
Nomeasaun nee reprezenta marku istoriku ida iha relasaun diplomatika entre Timor Leste no Kambodia hafoin vizita ofisial foin lalais nee husi Prezidente Senadu no Eis Primeiru Ministru Kambodia nian, Samdech Akka Moha Sena Padei Techo Hun Sen, mai Timor Leste, estabelesimentu Embaixada Kambodia nian iha Dili no aprezentasaun kredensial husi Embaixador Chun Sovannarith, sublina kresimentu parseria entre nasaun rua.
Nomeasaun Embaixador Marcos dos Reis da Costa reprezenta progresu signifikativu ida iha relasaun diplomatika entre nasaun rua no reflete kompromisu hamutuk ba kooperasaun rejional no dezenvolvimentu iha kuadru ASEAN nian.
(alb)
