DILI, STLTIMORLESTE.com – Primeiru Ministru (PM), Kay Rala Xanana Gusmão husu instituisaun estadu nian liu-liu orgaun soberania sira atu servisu hamutuk hodi prepara kondisaun neebe diak ba futuru ba jerasaun foun sira.
Kestaun nee Xefe Governu hatoo liu husi ambitu debate proposta Lei Orsamentu Jeral Estadu (OJE) 2026, iha faze jeneralidade neebe halao liu husi plenaria Parlamentu Nasional (PN), Kuarta (05/11/2025).
“Apelu ida ba instituisoens no liuliu, ba orgaun soberania sira mai ita servisu hamutuk no mos servisu hamutuk ho setor publiku no privadu tomak, husi tasi-feto ba tasi-mane, husi jovens ba katuas no ferik sira. Ita-nia forsa laos iha ita-nia reservas petroleo ou iha ita-nia lokalizasaun estratejika, maibe ita ita-nia povu iha nia rezilensia, iha nia kriatividade, iha nia determinasaun atu harii futuro ida neebe diak liu ba nia oan sira,” hatete PM, Xanana.
Xefe Governu hatutan, atu prepara kondisaun neebe diak ba jerasaun foun sira, mak entidade hotu-hotu tenki servisu ho disiplina hodi hasoru dezafius sira tuir mai.
“Mai ita avansa hamutuk – ho disciplina iha ita-nia finansas, ho ambisaun iha ita-nia reformas no ho unidade iha ita-nia objetivu nasional, tanba hamutuk mak ita sai fortes liutan hasoru kualker dezafiu,” hatete Xefe Governu.
Jornalista: Alberto Menezes
Editora: Carme Ximenes
