AINARO, STLTIMORLESTE.com – Primeiru Ministru (PM), Kay Rala Xanana Gusmão husu joven sira labele involve iha grupu arte marsiais hodi kria problema, maibe sai husi grupu arte marsiais hodi kria unidade domin no dame.
Mensajen nee Primeiru Ministru Kay Rala Xanana Gusmão apela, wainhira vizita ofisial ba kapela Ave Maria Fleisa iha Suku Aitutu, Postu Administrativu Maubessi, Munisipiu Ainaro, neebe reabilita husi sarani sira.
Durante vizita iha kapela Ave Maria Fleisa, Primeiru Ministru Kay Rala Xanana Gusmão louva sarani sira iha Suku Aitutu liu liu sarani joven sira mak esforsu makaas iha prosesu reabilitasaun kapela refere, tanba nee husu joven sira kontinua asaun refere no hadook aan husi grupu arte marsiais.
“Joven sira hau kontente tanba imi mak servisu hadia kapela nee, servisu nafatin ba labele tama arte marsiais hodi oho malu no estraga malu deit, mai hamutuk ba reza ba ita nia rai no ita nia maromak tulun ita hadomi malu hakaas aan lori rai nee ba oin,” Primeiru Ministru Kay Rala Xanana Gusmão hateten iha Aitutu, Sabado (07/03/2026).
Nunee mos Primeiru Ministru Kay Rala Xanana Gusmão nafatin husu joven sira atu hametin fiar espiritu unidade no dame nian hodi lao ba oin, kumpri promesa sira neebe promete ona ba beala sira no ba eroi no eroina sira.
Nomos husu joven sira atu respeita idozu no idoza sira, tanba husi sira nia sakrifisiu fo aan ba terus iha funu laran hodi liberta Timor sai nasaun ida
“Imi joven sira respeita imi nia avo katuas sira avo ferik sira mak erois ita nia indepedensia nian, nee duni labele halo sira laran triste, favor ida sai hotu husi arte marsiais buka arte foun ida mak unidade domin no dame hodi ita lao neineik mais lao beibeik hodi hadia rai nee hodi garante futuru diak ba labarik sira,” PM Xanana espresa.
(tom)
