DILI, STLTIMORLESTE.com – Primeiru Ministru (PM), Kay Rala Xanana Gusmão husu Ministra Finansas Santina Cardoso ho Visi Ministra, Regina de Jesus de Sousa servisu fuan ho laran nunee kaer didiak sistema finanseira iha Timor Leste.
Primeiru Ministru Kay Rala Xanana Gusmão hatoo lia hirak nee ba jornalista sira, bainhira remata partisipa serimonia pose Visi Ministra Finansas, Regina de Jesus de Sousa iha Palasiu Prezidensial Nicolau Lobato, Bairo Pite, Kinta (12/02/2026).
Primeiru Ministru hatete, nia konhese Visi Ministra foun, iha biban nee husu Ministra nomos Visi Ministra Finansas atu halao servisu ho fuan no laran.
Primeiru Ministru hatete, nia konhese diak Visi Ministra Regina de Jesus de Sousa nuudar espesialista finansas ho esperiensia liu tinan 20 iha Ministeriu Finansas. Nia lori konhesimentu tekniku nivel aas iha Jestaun Finansas Publikas (PFM) ba nia pozisaun foun. Nuudar eis Diretora Jeral Tezouru nian, nia sai instrumentu hodi asegura integridade, efisiensia no transparensia ba sistema finanseiru estadu nian, tanba nee hamutuk ho Ministra sei bele hadia sistema finanseira iha Timor Leste.
“Visi Ministra finansas foun, hau konhese ministra, hau konhese senhora ida nee, uluk too ohin antes mai tomada pose antes nee asume nuudar Diretora Jeral ema nee kompetente, responsavel, tanba ita mos iha prosesu hadia tiha sistema finanseiru neebe Governu kria muda ita nia sistema uluk nee mak feto nain rua nee sei kaer didiak sistema finanseira iha Timor,” dehan PM Xanana.
Iha biban nee Xefe Governu husu lideransa feto potensial nain rua atu koordena malu servisu nunee bainhira mandatu IX Governu remata sistema finanseira lao ho diak.
“Visi Ministra servisu ho didiak, Ministra Finansas servisu ho diak, koordena malu fo servisu ba malu hadia para ita hotu, ita nia mandatu sistema finanseiru tenke lao ho diak, no fo atensaun ba maluk sira neebe toma konta finansas iha munisipiu sira tanba ita atu tama ba desentralizasaun neebe parabens bom trabalho, ami nia konfiansa ho ita boot sira,” katak PM.
PM hatoo parabens ba Visi Ministra Finansas, tanba ohin bele asume ona kargu hodi troka Visi Ministra Finansas sesante neebe rezigna aan husi nia kargu, no Primeiru Ministru la.hatoo parabens mos ba Ministra Finansas tanba kontinua nia servisu nuudar ministra.
“La fo parabens tanba ita boot kontinuasaun servisu bom trabalhu, hau sei ezije ba imi nain rua servisu ho fuan ho ulun,” dehan Primeiru Ministru.
Xefe Governu husu nafatin Ministra ho Visi servisu fuan ho laran no kakutak nunee bele hadia sistema finanseira iha rai laran.
(eme)
