DILI, STLTIMORLESTE.com – Primeiru Ministru (PM), Kay Xanana Gusmão husu Prezidente Autoridade Munisipiu sira atu prepara aan, tenke hatudu sira nia aan hanesan munisipiu nia oan duni, hodi servisu hamutuk ho povu.
“Husu ba PAM sira nee hotu atu prepara aan, imi tenke hatudu imi nia aan nuudar munisipiu nia oan rasik, munisipiu nian duni no povu nia oan, ida nee mak atu husu ba joven sira estuda,” dehan PM iha Palasiu Prezidente Aitarak Laran, Tersa (02/09/2025).
PM akresenta, PAM sira hakarak saida ba munisipiu nee no ba povu iha munisipiu nee, sukat imi nia kbiit too iha neebe, no hili ida nee halo ida nee, maibe husu ba povu.
Reforsa, dala ruma ema presiza bee atu halo buat hotu halo dala ida labele, fo uluk ba balu povu sei sente responde sira nia nesesidade, no hotu hotu hatene, tanba nee halo konsulta ba malu tanba sa mak halo uluk ida nee no ida neeba, atu hetan objetivu komun ida hodi lao ba iha neeba, labele husik sira seluk iha kotuk.
Nia dehan, kona-ba kestaun ema ho kondisaun defisiensia, husu autoridade munisipal atu diskute kona-ba ema neebe ho defisiensia sira hakarak sentru ida atu ba eskola, ajuda sira.
“Husu atu koalia ba malu, no husu atu servi rai no povu ida nee, povu fiar bainhira haree imi iha vizaun, iha kbiit no aumenta konhesimentu atu buat hotu neebe munsipiu presiza bele,” dehan Xanana.
Tanba nee husu PAM sira atu servisu didiak, no knaar neebe sira hetan konfiansa neebe manan nee husi povu.
Iha fatin ketak, Akademiku Mario Dos Santos dehan, PAM sira nia papel importante tebes, tanba sira mak besik liu ba komunidade sira.
“Hau nia hanoin PAM nia papel importante tebes, tanba sira mak besik liu ba komunidade sira, tanba nee tau konfiansa ba sira atu bele halao servisu diak liu tan ho komunidade sira,” dehan nia.
Afirma tan, knar neebe hetan reprezenta povu, tanba nee halao knaar ho diak atu povu bele tau nafatin konfiansa ba servisu neebe PAM halao.
Jornalista: Terezinha De Deus
Editor: Xisto Mendonça
