DILI, STLTIMORLESTE.com – Primeiru Ministru (PM), Kay Rala Xanana Gusmão iha ninia diskursu ba serimonia Komemorasaun Aniversariu Camara de Comercio e Industria de Timor Leste (CCI-TL) liu husi seminariu loron ida, husu ba Setor Privadu sira atu hasae produsaun ai-haan iha rai laran liu husi investimentu iha setor agrikultura nomos setor turizmu.
“Hau husu ba emprezariu ou setor privadu nasional atu halo investimentu iha setor produtivu sira hanesan setor Agrikultura no Turizmu. Hau koalia ho Ministru Fimanas atu bolu ita boot sira atu diskute kona-ba setor produtivu sira atu neineik-neineik ita redus produtu importasaun, tanba maioria ai-haan sira nee kontamina ona ho kimika, labarik barak mak hetan moras tanba produtu importasaun,” dehan PM Xanana liu husi ninia diskursu iha seminariu loron ida neebe organiza husi CCI-TL iha ambitu aniversariu ba dala 15 neebe halao iha Salaun Laline Larigotu CNE Kolmera Dili, Kinta (22/05/2025).
Iha biban nee PM husu ba Emprezariu Timoroan sira atu hahu diskute ona oinsa atu halo investimentu iha setor Oin-oin iha rai laran, hodi diversifika ekonomia rai laran.
Iha biban nee Prezidente CCI-TL, Jorge Serano dehan, liu husi seminariu nee atu enkoraja emprezariu Timoroan sira hodi nafatin halo investimentu atu diversifika ekonomia TL.
“Hau hanoin kada emprezariu iha kedan ninia vizaun, misaun no objetivu atu halo investimentu iha setor oin-oin, tanba nee emprezariu sira kontinua halo investimentu maske sei kontinua hasoru dezafiu oin-oin, maibe sira nafatin iha interese halo investimentu, tanba nee CCI-TL sai hanesan mahon ba emprezariu sira, halo akompanhamentu no akonselamentu liu husi formasaun nomos seminariu atu dudu setor privadu sira lao ba oin, dehan nia.
Iha biban nee, Jorge Serano husu ba emprezariu sira atu nafatin esforsu aan, atu halo investimentu iha setor oin-oin, hodi diversifika ekonomia TL lao ba oin.
Partisipa iha seminariu nee mai husi Prezidente CCI-TL munisipiu sira hotu ho membru sira.
(jos/joa)
