DILI, STLTIMORLESTE.com – Relasiona ho selebrasaun Loron Mundial Lingua Português nian neebe kada tinan selebra iha loron 5 de Maiu, nunee Primeiru Ministru (PM) Kay Rala Xanana Gusmão enkoraja inan aman sira atu motiva oan sira nafatin aprende lingua português, tanba lingua português mak identidade Timor nian.
“Inan aman sira, imi tenke motiva nafatin imi nia oan sira aprende lingua português, tanba tuir ita nia istoria português mak ita nia identidade, laos inglês no laos mos bahasa, nunee tenke dudu no enkoraja labarik sira ba estuda português,” dehan PM Xanana ba jornalista sira iha Palasiu Governu, Segunda nee (05/05/2025).
PM sublina, iha tinan 24 bahasa mak tama ona iha Timor oan tomak nia ulun, nunee tenke soe tiha, bele hatene nafatin mais soe tiha ba sorin, tanba lae ita sai fali parte husi Indonezia nian.
“Ohin loron ukun aan tinan 23 ona ita nia Estadu iha prosesu konstrusaun estadu nia sei fraku, tanba ita la konsege entende malu, tanba ita domina lian ida neebe lo-loos ita hotu tenke domina, tanba nee mak inan-aman neebe ohin lori oan sira mai, iha eventu ida nee tenke enkoraja sira,” dehan PM Xanana.
PM Xanana mos hatoo agradese ba Governu Português neebe estabelese Eskola CAFE hodi bele ajuda, tanba Timoroan atu hanorin português susar oituan tanba la domina, nee duni agradese ba Governu Português neebe estabelese Eskola CAFE iha Timor Leste.
Iha fatin hanesan, Ministra Edukasaun, Dulce de Jesus sublina, ohin selebra loron ba lingua portuguesa nian, papel importante Ministeriu Edukasaun nia mak atu garante ensinu aprendizajen português dezde inisiu iha eskola sira liu husi metodu neebe mak bele favorese atu Timoroan hotu bele aprende português ho kualidade.
“Hau hanoin ida nee mak esforsu Ministeriu Edukasaun halo no esforsu nee kontinua halo iha futuru tanba lingua português nee lingua ofisial,” katak ME Dulce de Jesus.
Entretantu iha ambitu selebrasaun loron mundial ba lingua portuguesa nee reprezentante estudante pre eskolar husi eskola KAFE Dili, simbolikamente entrega mos livru ba Primeiru Ministru (PM) Kay Rala Xanana Gusmão.
(EST 2)
