DILI, STLTIMORLESTE.com – Primeiru Ministru (PM), Kay Rala Xanana Gusmão halao inaugurasaun ba edifisiu Conferencia Superiores Maiores Timor Leste (CSM-TL), iha Suku Manleuana, Postu Administrativu Dom Aleixo, Munisipiu Dili.
Primeiru Ministru husu ba relijiozu no relijioza sira nebe utiliza fatin nee nuudar sentru ba diskusaun, troka hanoin ba malu hodi haburas moral iha sosiedade perante mundu modernu.
“Fatin nee laos deit sai hanesan edifisiu ida maibe nuudar sentru diskusaun no troka opiniaun ho ita nia sosiedade kona-ba moral neebe besik atu lakon ona. Tanba nee, kontribuisaun hosi kongregasaun oioin iha Timor-Leste fantatiska tebes maibe ida-nee deit la too,”hatete PM Xanana liu husi nota komunikadu imprensa neebe STL asesu husi media Gabinete Primeiru Ministru, Segunda (02/02/2026).
Xefe Governu apresia ho prezensa misionariu sira iha Timor Leste neebe kontinua oferese formasaun oioin ba Timoroan sira iha parte intelektual, moral no espiritual nian.
Iha fatin hanesan, Prezidente Conferencia Episcopal Timorense (CET) atual Arsebispu Arkedioseze Metropolitana Dili, Dom Virgílio Cardeal do Carmo da Silva, SDB agradese ba IX Governu Konstitusional liu husi Gabinete Apoiu Sosiedade Sivíl (GASC) neebe finansia konstrusaun tomak edifísiu nee.
“Agradese ba IX Governu Konstitusional liu husi subvensuan publika ba CET hodi finansia projetu ida-nee. Agradese mos ba entidade hotu-hotu neebe kontribui ba prosesu tomak konstrusaun too finaliza,” Dom Virgílio agradese.
Prezidente CSM-TL, Padre Anacleto Pires, SBD fiar katak obra ida nee harii ho fundamentu fiar no komunaun domin fraterna, parte integrante hosi obra Maromak Nian rasik.
Konstrusaun edífisiu ida-nee bele hahu no finaliza tanba espiritu kontribuisaun husi parte barak, suporta no kolaborasaun la kolen hosi Governu ho Igreja Katolika liu-hosi CET atu fasilita no haburas prezensa no testemunha misionariu sira iha TL.
Agora daudaun Kongresaun no Institutu Sekular sira neebe servi iha Timor Leste hamutuk 89. Kongresaun maskulina hamutuk 22, femenina 62, Institutu Sekular hamutuk lima. Komunidade sira hamutuk 284 ho membru sira neebe haknaar an iha komunidade sira nee hamutuk 1.960.
Edifísiu ida nee intensionalmente sei sai espasu ba enkontru, formasaun interkongregasional inisial no kontinua ba membru sira, dialogu no sai sentru atu rona diak liu tan Espiritu Santu, haklean espiritu sidadania no hametin misaun profetika moris konsagrada nian iha kontestu TL.
“Ami hatoo profunda gratidaun espesiál ba prezensa Primeiru Ministru IX Governu Konstitusional, Kay Rala Xanana Gusmão neebe asina plaka no koa fita. Suporta no prezensa kontinua Governu nian too iha momentu ida nee sai sinal invizional katak Igreja Katolika no Estadu RDTL lao hamutuk iha espiritu no komplementalidade no kolaborasaun mutua ba promosaun bem komun no dignidade umana,” Padre Anacleto hateten.
Montante orsamentu ba konstrusaun edifisiu ida-nee hamutuk $1,340,000 neebe hetan bensaun hosi Pro-Prezidente CET, atuál Bispu Dioseze Maliana, Dom Norberto do Amaral akompania husi Bispu Dioseze Baucau, Dom Leandro Maria Alves, reprezentante Santa Se iha Timor Leste, Koordenador Gabinete Apoiu Sosiedade Sivil, Joaquim Soares Freitas, relijiozu-relijioza sira no autoridade komunitaria sira.
(alb)
