ATAURO, STLTIMORLESTE.com — Iha loron Sabadu (05/04/2025), Primeiru Ministru (PM), Kay Rala Xanana Gusmão halo inaugurasaun ba projetu transformasaun tasi been sai bee moos iha Aldeia Waru Ana, Suku Bikeli, Administrativa Atauro.
Liu husi Komunikadu neebe STL asesu husi Media Gabinete Primeiru Ministru iha loron Segunda nee (07/04/2025) PM Xanana dehan, transformasaun tasi been sai bee moos nee hanesan projetu pilotu neebe implementa husi Ministeriu Turizmu no Ambiente liu husi Diresaun Jeral Ambiente, hahu kedan halo estudu no esprimenta iha tinan 2022 no iha tinan nee konsege inaugura.
Hahu ohin ba oin projetu nee sei benefisía komunidade iha Aldeia Akrema, Fatu no Waru-Ana neebe la asesu ba bee moos iha tempu naruk nia laran.
Primeiru Ministru, Kay Rala Xanana Gusmão husu komunidade atu kuidadu projetu nee, hodi nunee komunidade iha area nee bele utiliza ba nesesidade loron-loron nian.
Iha fatin hanesan, Visi Primeiru Ministru no Ministru Koordenador ba Assuntu Ekonomiku, Ministru Turizmu no Ambiente, Francisco Kalbuadi Lay husu atu komunidade tau matan hamutuk ba projetu nee atu iha futuru bele aumenta tan projetu transformasaun tasi been sai bee moos iha aldeia sira seluk.
Partisipa iha serimonia inaugurasaun nee husi Ministru Obras Publikas, Samuel Marçal, Ministru Agrikultura, Pekuaria, Peska no Florestas, Marcos da Cruz, Sekretáriu Estadu Florestas, Fernandinho Vieira, Diretora Ezekutiva Gabinete Fronteiras Terrestres no Marítimas, Elizabeth Exposto, Prezidente Autoridade Administrativa Atauro, Mateus Belo ho estrutura inklui komunidade.
(jos)
