DILI, STLTIMORLESTE.com – Primeiru Ministru (PM), Kay Rala Xanana Gusmão lamenta atuasaun Polisia Nasional Timor Leste (PNTL) ba Reitor Universidade Nasional Timor Lorosae (UNTL) nomos Visi Reitor no kargu Xefia nain haat seluk.
Primeiru Ministru Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicoalu Lobato, Bairo Pite, Kinta nee (15/01/2026).
PM hatete, Governu liu husi Konselhu Ministru lamenta ho mandadu husi Tribunal hodi haruka PNTL detein Reitor UNTL ho Visi Reitor nomos Xefia nain haat seluk.
Primeiru Ministru Kay Rala Xanana Gusmão mai hatoo mos ba Prezidente katak, Governu liu husi Konselhu Ministru lamenta ho Tribunal neebe hasai mandadu hodi buska apresaun ba Reitor UNTL no kargu Xefia nain 5 seluk.
“Hau informa ba Prezidente hodi bainrua akontese buat neebe ami koalia iha Konselhu Ministru, ami sente la simu tanba justisa halo buat sira laiha liu konsiderasaun, kazu mosu UNTL tinan rua kotuk ba ona nee ba tiha ona tribunal, buat sira nee hotu mais derepente deit mosu mandadu ida bolu polisia ba kaer dosente sira iha neeba alzema tiha, reitor mai husi kupang iha neeba kedas kaer alzema sira prezu ona, maibe desizaun nee seidauk hatene tan buat ida,” dehan PM.
Tribunal dehan informa ba sira katak loron rua loron tolu nia laran tenke aprezenta aan ho dokumentus iha Ministeriu Publiku.
“Nee mandadu ida entrega ba ema laos ba kaer ema, alzema fali, ita bulak tiha deit, nee horiseik mos ami koalia iha Konselhu Ministru, ami lamenta tebes, no Konselhu Ministru lamenta tebes asoens sira lahun la dikin nee, nee mak bainhira ita temi dehan reforma justisa tenke iha duni reforma,” dehan PM Xanana.
PM Xanana laos dehan doutor tiha ona matenek tiha ona laiha, maibe iha Konselhu Ministru mos diskute assuntu sira nee hotu, buat barak tebes.
Iha sorin seluk, Ministru Ensinu Superior Siensia no Kultura (MESSK), Jose Honorio da Costa Pereira Jeronimo lamenta ho detensaun PNTL ba Reitor UNTL, Vise Reitor no kargu xefia nain haat.
Ministru Ensinu Superior Jose Honorio dehan, karik sira halo buat ruma ladun diak iha UNTL, tuir lo-loos tribunal fo karta ba Reitor nunee sira bele ba presta deklarasaun.
“Dahuluk hanesan Ministru nunee mos hanesan Timoroan lamenta ho situasaun nee, se tribunal hatene katak sira halo aktu ruma la diak iha UNTL, lo-loos haruka karta ba sira no bolu sira presta deklarasaun, maibe hodi bainrua polísia ba halo detensaun ba sira nee, detensaun ida hau lamenta, tanba tratamentu ba sira laos hanesan profesor sira universitariu, sira la halo krime boot ruma, se krime boot mos lei iha kondena sira,” Ministru JoseHonorio dehan.
Kona-ba problema nee, Primeiru Ministru Kayrala Xanana Gusmão mos husu ba MESSK atu haree ho seriu, nunee situasaun sira nee labele akontese beibeik iha Timor Leste.
(eme)
