RAEOA, STLTIMORLESTE.com – Primeiru Ministru (PM), Kay Rala Xanana Gusmão lansa dijitalizasaun sistema saúde iha Rejiaun Administrativa Espesiál Oekusi Ambeno (RAEOA).
Serimonia lansamentu nee, Primeiru Ministru akompanha husi Prezidente Autoridade RAEOA, Rogério Tiago Lobato ho Koordenadór Komisaun Ezekutiva Zona Ekonómiku Espesial Dezenvolvimentu Oekusi Ambeno (ZEEDOA), João Mendes Gonçalves iha salaun enkontru Otel Bintang Lima Oe-Upun, Tersa (18/02/2025).
Sistema dijitalizasaun saude nee hanesan programa ida husi IX Governu Konstitusionál no hosi loron ohin ba oin implementa dijitalizasaun iha administrasaun publika hahu husi RAEOA.
Primeiru Ministru konsidera dijitalizasaun sistema saude nee importante atu bele hafasil servisu, maibe tenke hetan mos apoiu integradu husi area importante sira seluk hanesan estrada, eletrisidade no seluk tan.
“Dijitalizasaun setor saude bele lao ho diak, buat sira seluk mos tenke book aan hodi kompleta malu, se lae dijitalizasaun nee hela ho mehi deit,” hatete Kay Rala Xanana Gusmão liu husi nota komunikadu neebe STL asesu husi media Gabinete Primeiru Ministru.
Tanba nee la too deit iha lansamentu nee no Xefe Governu dehan, laos ohin lansamentu nee halo ona Oekusi naran boot ona lae, tenke servisu makaas liu tan iha area hotu-hotu, tanba servisu sei barak.
Prezidente Autoridade RAEOA, Rogério Tiago Lobato introdus katak, dijitalizasaun nee komesa husi RAEOA no espera katak ho programa ida nee bele sai hanesan projetu pilotu ida ba Timor Leste laran tomak, tanba prosesu dezenvolvimentu iha mundu tama ona iha dijital no laiha ona servisu manual.
Fatin hanesan, Sekretariu Rejional Asuntu Saude, Luis de Jesus Neno relata, RAEOA iha Hospital Referal ida, Sentru Saude 5, Postu Saude 20, no agora daudaun aumenta fatin tratamentu iha suku 11 iha área remotas.
“Ita aumenta fatin tratamentu 11, tanba tinan barak nia laran ferik katuas sira hela ho distansia dook la asesu ba atendimentu saude,” nia relata.
Ho lansamentu nee Luis Neno garante katak, sei hafasil iha rekolha dadus saude nian neebe iha no programa ida nee sei instala iha fasilidade saude hotu iha RAEOA.
Husi sistema dijitalizasaun nee, bainhira pesoal saude sira halao tratamentu karik iha loron ohin, bele asesu kedan dadus nee ho lais liu-liu total pasiente, tipu moras neebe numeru aas liu iha RAEOA, pasiente ho kategoria labarik, joven, ferik no katuas, inklui bele hatene kedan ho item medikamentus hira mak utiliza.
Partisipa iha serimonia lansamentu nee, Sekretáriu Rejional sira, Autoridade Seguransa, funsionariu sira RAEOA nian, autoridade lokal no populasaun.
(alb)
