DILI, STLTIMORLESTE.com – Primeiru Ministru (PM), Kay Rala Xanana Gusmão hatur fatuk dahuluk hodi halo konstrusaun ba sentru idozu neebe lokaliza iha area Tasi-Tolu, Dili.
Sentru ba idozu nee jere husi irmã sira Congregatio Imitationis Jesu (CIJ) no hetan apoiu husi IX Governu Konstitusional liu husi Gabinete Sosiedade Sivil hamutuk US$ 9.000.
PM Xanana kongratula Congregatio Imitationis Jesu, tanba mai ho misaun neebe lao tuir duni Jesus Kristu.
“Ohin ita tau hela fatuk dahuluk ba uma idozu sira nian. Ida nee hatudu katak, Madre sira husi kongregasaun ida nee lao tuir duni Jesus nia dalan. Imi halo tuir Jesus Nia hanorin. Jesus hanorin ita hadomi ema seluk, ajuda ema seluk, nunee ita bele haree mundu hanesan fatin ida atu bele moris. Ida nee mak Papa Francisco mai vizita ita, temi kona-ba Fraternidade Umana,” hateten PM Xanana liu husi nota komunikadu neebe STL asesu husi media Gabinete Primeiru Ministru, Segunda (24/02/2025).
Xefe Governu konsidera idozu sira presiza duni atensaun, tanba dala ruma iha uma ida, família okupadu ho servisu neebe ladun tau atensaun ba sira.
Governu fo atensaun mak liu husi fo osan kada fulan, maibe ida nee dala ruma membru família sira utiliza sala tiha osan nee la ba nesesidade idozu sira nian.
“Uma ba idozu sira nee diak tebes. Parabens ba imi, ba buat sira neebe imi halo. Husu boot ba imi mos atu bolu feto raan sira hodi koalia, muda sira nia mentalidade oituan, hadia sira nia konsiensia moral oituan, fo forsa, fiar aan ba sira, tanba ikus nee problema boot akontese iha komunidade nia leet,” Xefe Ezekutivu nee fo hanoin.
Kay Rala Xanana Gusmão enkoraja atu servisu nafatin no husu atu halo obra ho kualidade, nunee bele utiliza ba tempu naruk.
Biban hanesan, Madre Superiora Komunidade CIJ, Fomentu I, Madre Maria Odélia agradese bá Primeiru Ministru tanba apoia ona hodi harii uma nee.
“Avo Nana nuudar aman ida ho domin tomak mai vizita ami iha loron 15 fulan Outubru 2023. Ho sensibilidade neebe aas nuudár aman rai nee nian rezolve ona saida mak ami hahu ona. Bele hatutan ami nia liman no ain no haforsa fila-fali ami nia forsa neebe la too. Ami la hatene oinsa atu koalia no mos uza linguajen oinsa. Ami hatoo deit obrigada wain no orasaun atu Maromak haraik nafatin isin diak hodi kontinua servi rai no povu ida nee,” Madre Maria Odélia hateten.
CIJ labele espresa klean diak tomak neebe aman domin nian nee fo, laiha murak me’an no murak mutin atu fo.
Komunidade CIJ agradese wain ba IX Governu Konstitusional liu husi Gabinete Sosiedade Sivil neebe apoia ona no osan ne’e sei utiliza hodi selu badaen inklui sosa materiál hodi finaliza konstrusaun nee, espera katak tinan oin Primeiru Ministru hamriik fila fali hodi inaugura.
Uma nee sei akumula idozu hamutuk 100 no kompleta ho fasilidade, iha mos sentru saude, kapela, sentru formasaun no fatin jinastiku no nia durasaun ba konstrusaun tinan 2.
(alb)
