DILI, STLTIMORLESTE.com – Primeiru Ministru (PM), Kay Rala Xanana Gusmão halao vizita ba Hospital Nasional Guido Valadares (HNGV), hodi halo observasaun direta ba makina CT Scan neebe iha loron hirak nia laran sai polémika iha publiku.
Primeiru Ministru mos hasoru malu ho Komisaun F Parlamentu Nasionál (PN) neebe halao fiskalizasaun iha fatin nee, liu-liu haree mos kondisaun mákina CT Scan.
“Hau mai iha nee hodi haree makina sira nee. Los duni iha makina ida mak foin daudaun nee sira halo manutensaun, tanba ninia korente mak besik kotu maibe sira mos dehan, aloka ona osan hodi sosa no antes Dezembru remata too ona Timor,” hatete Primeiru Ministru iha HNGV, Tersa (17/12/2024).
Primeiru Ministru haree direta katak, iha mós makina impresora neebe baibain utiliza hodi imprime rezultadu teste CT Scan no seluk tán aat hela. Nee duni iha Orsamentu Jeral Estadu (OJE) 2025 nian rekomenda kedan atu iha Janeiru 2025 impresora nee bele hola iha Singapura no tenke too Timor.
Xefe Governu konsidera prezensa Komisaun F iha HNGV nee importante no diak tebes, tanba bele haree direta ema neebe mak mai halo manutensaun ba makina sira nee loos ka lae, buat seluk hanesan makina Magnetic Resonance Imaging (MRI) funsiona hela.
Iha fatin hanesan, Diretor Servisu Apoiu Diagnostiku no Terapeutiku iha HNGV, Vidal Lopes esplika, makina CT Scan ne’e mak makina ida neebe klasifika iha ekipamentu ida neebe sufistikadu no uniku makina neebe Timor Leste iha, hafoin Governu sosa iha 2017.
Vidal Lopes sita katak, iha loron hirak ba kotuk mákina CT Scan nee sai isu boot too iha nível altu, hanesan iha Parlamentu Nasionál uza hanesan argumentu polítiku, maibé hanesan dirijente iha HNGV hakarak atu esklarese teknikamente ba publiku no povu enjeral katak, mákina nee detekta ninia tali korea mak iha problema oituan no iha ona sinal atu kotu.
“Nunee ami desidi hodi halo deit ba pasiente sira neebe ho kategoria urjente. Ezemplu pasiente ida monu ho pankada iha ulun, bainhira too mai ho kondisaun lakon sentidu, kazu sira hanesan nee mak presiza halo uluk CT Scan tanba konsidera Urjente,” nia esplika.
Antes nee, loron ida parte HNGV bele halo CT Scan ba pasiente nain 18 to’o nain 20, maibe depois de mosu sinál iha tali korea atu kotu nee, dirijente sira desidi hodi halo de’it CT Scan loron ida nain 6 too nain 8, tanba tenke kuidadu mákina ne’ebé ho folin milhaun US$ 1 resin.
Parte HNGV labele mantein ho ritmu halo CT Scan bá pasiente nain 18 to’o 20, tanba bainhira mákina nee aat mak sei paradu totál no pasiente hotu-hotu neebe tama HNGV laos tenke halo CT Scan, maibé halo deit ba sira neebe iha duni indikasaun.
Tuir dadus, pasiente neebe baixa iha HNGV 400 resin no sira neebe konsulta esterna nain 500 kada loron. Signifika mínimu, maibé husi númeru ida nee bele fo prioridade ba ida neebe urjente duni.
Situasaun nee mos dirijente HNGV esplika ona bá Komisaun F no esplika teknikamente direta bá Primeiru Ministru neebe too hodi haree direta fatin ida nee.
Solusaun atu halo fali mákina CT Scan ne’e bele diak fali 100%, mak dirijente sira HNGV nian fo ona responsabilidade ba kompanhia estranjeiru ho naran OSEANU atu hadia ho determinasaun tempu antes tinan foun tenke di’ak ona 100% atu bele utiuliza hanesan baibain.
Tali korea husi mákina nee tenke sosa iha Singapura ho folin US$ 17.000, tanba Indonézia laiha.
(alb)
