DILI, STLTIMORLESTE.com – Primeiru Ministru (PM), Kay Rala Xanana Gusmão orienta Ministru Obras Publikas (MOP), Samuel Marçal ho tekniku sira, loke estrada foun husi Pertamina Internasional Timor SA (PITSA) nia kotuk parte tasi ibun, hodi liga estrada ba Aeroportu Internasional Nicolau Lobato, Komoro, Dili.
Xefe Governu konsidera, bainhira loke luan estrada nee sei fasilita movimentu trasnporte publiku ba mai iha parte tasi nian labele mosu engarrafamentu.
“Kalan nee kedas, imi koordena ho sira pertamina para loke kedas estrada ida husi pertamina kotuk nee muda hotu sasan, ateru rai para loke etrada nee liga malu husi Bebonuk nian besik ba aeroportu,” PM Xanana fo orientasaun ba Ministru Samuel, hafoin halao observasaun ba alargamentu estrada iha Fatuhada, Kuluhun, Bekora, Pantai Kelapa, Manleuana no Beduku nian, iha segunda loraik (24/03/2025).
Hafoin simu orientasaun, Ministru Samuel koordena kedan ho Institutu Jestaun Ekipamentu Apoia Dezenvolvimentu Infraestrutura, Institutu Publiku IGEADI, IP) hodi koordena kedas ho ekipa Pertamina Internasional hahu servisu ateru rai iha parte pertamina nia kotuk.
“Kalan nee kedas ami hahu servisu ida nee,” dehan Ministru Samuel ba jornalista sia iha Bebonuk.
Observa Progresu Alargamentu Estrada
Hafoin ida nee, Xefe Governu ho MOP halao mos observasaun ba prosesu alargamentu estrada iha parte Fatuhada, Kuluhun, Bekora, Manleuana no area Beduku nian.
PM Xanana agradese ba alargamentu estrada iha parte Fatuhada ba area Hudi Laran, populasaun kolabora ho governu hodi fo espasu loke luan estrada.
“Agradese ba ita nia povu, tanba sira komprende hodi apoia servisu hirak nee,” PM Xanana hateten iha Bairu Hudi laran ho ksolok no agradese.
Iha okaziaun nee, Ministru Obras Publiku informa ba PM Xanana katak, populasaun Fatuhada no parte Hudi Laran ho nian ekipa halo ona identifikasaun hodi fo kompensasaun tuir akordu neebe povu rasik aseita liu husi dialogu neebe halao ona ho partisipasaun autoridade sira.
(jos)
