AINARO, STLTIMORLESTE.com – Primeiru Ministru (PM), Kay Rala Xanana Gusmão entrega estatua orienta Ministeriu Obras Publikas (MOP) atu reabilita kapela Ave Maria Fleisa iha Suku Aitutu, Postu Administrativu Maubessi, Munisipiu Ainaro.
Iha loron 07 Marsu nee, Primeiru Ministru Kay Rala Xanana Gusmão akompanha husi Ministru Obras Publikas no Sekretariu Estadu Komunikasaun Sosial ofisialmente vizita kapela Ave Maria Fleisa iha Suku Aitutu hodi observa direita kondisaun kapela refere.
Durante Primeiru Ministru nia observasaun ba kapela refere nota iha kondisaun balu prezisa halo reabilitasaun hodi sanari sira uza ba misa Domingo no loron Santo sira tuir fiar igreja Katolika nian.
“Agradese tebes-tebes ohin Ministru Obras Publikas too iha nee, nia sei haruka husi ADN haruka tekniku sira mai halo kalkulus didiak iha saida mak presiza ita hadia tiha kapela nee,” Primeiru Ministru Kay Rala Xanana Gusmão hateten iha resintu kapela Ave Maria Fleisa, Sabadu (07/03/2026).
PM sublina, Ministeriu Obras Publikas sei liu husi Ajensia Dezenvimentu Nasional (ADN) orieta tekniku sira halo levantamentu dadus ba kapela refere hodi kontinua ba prosesu reabilitasaun.
Tanba kapela refere liu husi kontribuisaun sarani sira nian hodi joven sira halo ona reabilitasaun, maibe seidauk sifusiente nunee Governu liu husi Ministeriu Obras Publikas ajuda hodi finaliza obra refere.
“Husu nafatin ba joven sira sasan balu sei mai, kapela nee imi nian, Maromak sei la haluha imi nia kolen hadia kapela ida nee. Nee duni obrigadu ba oportunidade mai hasoru imi, hein fali loron ida bele mai ita inaugura kapela nee,” PM Xanana katak.
Iha fatin hanesan, Xefe Suku Aitutu, Grigorio Lopes Pereira haktuir, kapela Ave Maria Fleisa harii iha tinan 1990 ho espasu neebe ladun sufisiente ba sarani sira iha Suku Aitutu atual hodi utiliza iha misa Domingu no loron Santo Santa sira nian, nunee iha tinan 2023 sarani sira inisia kontribuisaun aumenta espasu iha kapela refere, tanba daudaun numeru sarani iha Suku Aitutu aumenta, maibe kontribuisaun neebe sarani sira halo la sufisiente no reabilitasaun ba kapela refere daudaun paradu.
“Osan gasta nee rihun 4 ona, nee inisiativa husi sarani sira ohin loron kapela nee seidauk termina,” Grigorio Lopes Pereira informa.
Padre Parokia Imaculado Coração de Maria, João Soares rekonhese, orsamentu ba reabilitasaun kapela refere kontribuisaun husi sarani sira no laiha orsamentu ruma husi Dioseze Dili, tanba parte parokia seidauk hatoo asuntu refere ba Dioseze.
“Kontribuisaun osan ami seidauk hatoo ba Dioseze katak ami halo hela konstrusaun, em prinsipiu ami hahu ho sarani sira, ida nee ami seidauk hatoo ba Dioseze husu ajuda ruma, Dioseze mos la hatene oras nee ami halo hela konstrusaun,” Padre João Soares argumenta.
Nia komenta, mezmu prosesu reabilitasaun kapela la hetan ajuda husi Diozese Dili, maibe Primeiru Ministru Kay Rala Xanana Gusmão hamutuk ho Ministru Obras Publikas kompremitidu sei kompleta reabilitasaun kapela refere too finaliza.
“Liafuan hirak neebe Avo Nana tatoli hela, espera ba oin ita la hatene bainhira maibe hein katak liu husi vizita no koversa bele realiza duni em nome sarani sira iha kapela ida nee agradese ba Avo Nana nomos Ministru Obras Publikas neebe mak marka prezensa iha nee,” Padre João Soares espera.
Aleinde Primeiru Ministru ho nia komitiva vizita ofisial nee entrega mos estatua nossa Senhora de Fátima no kruz ba kapela refere.
Entretantu iha vizita ofisial nee hetan partisipasaun masimu husi autoridade sivil no militar iha Postu Maubesi, komunidade no estudante sira.
(tom)
