DILI, STLTIMORLESTE.com – Primeiru Ministru (PM), Kay Rala Xanana Gusmão dehan, problema salariu minimu oras nee daudaun sai hanesan problema boot tebes-tebes, neebe IX Governu ate esklarese buat ida katak presiza hadia sistema iha funsionamentu Governu no foin lalais nee Governu hahu halao promosaun de vidas ba Polisia Nasional Timor Leste (PNTL).
“Problema salariu minimu oras nee daudaun sai hanesan problema boot tebes-tebes ba ita, neebe IX Governu atu esklarese katak, ita presiza sistema diak ida iha funsionamentu Governu,” dehan PM Xanana iha Sentru Konvensaun Dili, Tersa (06/05/2025).
Nia haktuir tan katak, foin daudaun nee publiku akompanha Governu hahu hadia sistema ba PNTL ninian, seidauk diak maibe hahu hadia daudaun ona, sei hadia sistema iha edukasaun ba metre sira, protesta barak, ema balun karik fo han edukasaun ba sira loron-loron maibe karik osan agora laiha ona atu fo han etu edukasaun laiha ona, neebe sira laiha protestu ona, tanba nee tenke hadia sistema, saude mos tenke hadia sistema, iha fatin seluk mos tenke hadia sistema.
“Ho ida nee mak laos problema boot mak atan hau neebe la hatene buat ida, laos deit ita aumenta salariu minimu, ita hadia sistema tanba ita iha prosesu konstrusaun Estadu, tanba lae ita boot sai Ministru hatama ema arbiru, barak mak manan osan maibe la hatene buat ida, sura arbiru neebe tenke hadia sistema,” afirma PM Xanana.
Nia haktuir tan katak, nuudar PM ho Membru Governu neebe hafoin simu tomada de pose fo kompetensia tomak ba Komisaun Funsaun Publika (KFP), sira halo hela estudu, sira halo estudu tomak kona-ba sistema neebe ba funsionalizmu neebe laos arbiru ona,” dehan PM Xanana.
“Sistema neebe durante nee hatama deit ninia primu, irmaun neebe kada fulan la halo buat ida, maibe simu osan kada fulan ho montante US$ 8.000 ba leten, neebe IX Governu tenke halo sistema diak ida, depois mak ita haree ba salariu. Salariu ami haree hotu ona maibe seidauk bele hasai, agora la hasai tinan seluk, importante mak hadia uluk sistema lai, se mak servisu tinan barak ona, tama ba idade avansadu, haree nia lai, depois hasai ho kondisaun,” dehan PM Xanana.
Nia afirma, salariu minimu nee sei haree maibe hadia uluk kondisaun lai, laos hakilar atu hasae salariu minimu.
“Ita konstrusaun Estadu prosesu ida laos fasil, maibe ita hadia etapa ba etapa, depois mak ita haree took, tanba doutor no mediku sira balun hatene kura ema, maibe tanba deit osan mos la too, sira ba halo fali klinika, dadersan sira serbisu iha Ospital, loraik servisu iha klinika, neebe nia simu osan iha datin rua, ida nee ita tenke haree didiak prosesu nee,” akresenta PM.
Nia afirma, IX Governu la haree ba buat ida deit maibe haree ba buat hotu-hotu hodi nunee haree ida neeba aumenta salariu tenke aumenta, tanba nee konstrusaun Estadu laos haree deit salariu minimu.
(jos)
