DILI, STLTIMORLESTE.com – Primeiru Ministru (PM), Kay Rala Xanana Gusmão relata atividade neebe Governu liu husi Konselhu Ministru aprova ona ba Prezidente Republika (PR), Jose Ramos Horta.
Bainhira remata hasoru malu, Primeiru Ministru Kay Rala Xanana Gusmão ba jornalista sira iha Palasiu Prezidensial Nicolau Lobato, Bairo Pite, Kinta (15/01/2026) hatete, mai hasoru Prezidente Republika hodi koalia kona-ba situasaun jeral, koalia kona-ba Konselhu Ministru horiseik (Kuarta) aprova ona buat barak.
“Mais horiseik ami aprova tiha dekretu lei ida ba termus de kontratu ba funsionariu ida nee bele mos problema mais ami sei buka rezolve, maibe importante tebes tanba laiha regra diak atu halo tuir, haree katak osan barak mak tau hela iha neeba maibe produtividade laiha, tanba nee mak ho Prezidente Funsaun Publika foun nia agora servisu makaas tebes hodi bele hadia tiha buat sira nee hotu,” dehan PM Xanana.
Primeiru Ministru dehan, ezemplu kazuais hatama beibeik no tau tiha osan depois tama Marsu, Abril hatama tan ema, tanba nee ba administrasaun publika tenke tuir regra neebe lo-loos.
Diretor ida iha fatin ida servisu kapaas tebes, mais sai tiha boot iha fatin ruma husu fali lisensa sein vensimentu ba fali fatin seluk asesora la halo buat ida, simu osan boot maibe la halo buat ida, nee halimar deit, kazu oin-oin deit.
Tanba nee mak Governu sei haree didiak ida neebe halo servisu kontinua ida neebe ba tuur deit la halo buat ida sei hasai tiha.
“Tanba nee mak informa ba Prezidente, tanba dekretu lei sei mai hau tenke esplika tiha tanba PR nia mak sei asina, nia mak promulga,” dehan PM Xanana.
PM dehan, iha Kuarta horiseik Governu liu husi Konselhu Ministru mos diskute kona-ba problema lei partidu politiku nia.
“Lei partidu politiku, tanba ita rai demokratiku, ita labele dehan katak hau prezidente partidu atu ba Prezidente Partidu so hau nia familia, ema seluk labele tama, ida nee sa demokrasia mak ida nee, neebe laiha eleisaun neebe hau sai ka mate ida seluk mai kedas, nee mundu kria kapaas los, ida nee impede tiha, ami aprova tiha haruka ba parlamentu sei aprova,” dehan PM Xanana.
Ida seluk mos partidu ida labele sai fali uma ba iha arte marsiais, maibe tenke loke ba ema hotu hotu para atu partisipa.
Horiseik aprova buat balun tan no haruka ona ba Parlamentu Nasional mak sei diskute buat sira nee hotu, no horiseik mos haree kona-ba lei eleitoral tanba sei ba too iha Munisipiu iha 2027 sei iha eleisaun iha Munisipiu.
Lei eleitoral mos husu partidu hotu-hotu neebe sei ba iha eleisaun jeral ka eleisaun iha munisipiu, se deit tenke sede iha kapital Dili no iha munisipiu hotu hotu.
“Ami hanoin hela too postu maibe dehan lae, mais iha munisipiu hotu hotu primeiru tenke iha sede ida iha neeba para prepara aan ba buat sira nee hotu,” katak PM.
Xefe Governu hatutan, Primeiru Ministru Australia sei mai iha semana oin 28 Janeiru no Governu prepara hela oinsa bele garante fatin, tanba sira hakarak fatin neebe luan oituan.
(eme)
