DILI, STLTIMORLESTE.com – Primeiru Ministru (PM), Kay Rala Xanana Gusmão relata atividade Governu neebe halo ona no balu neebe seidauk halao ba iha Prezidente Republika (PR), Jose Ramos Horta.
Bainhira remata hasoru malu, Primeiru Ministru Kay Rala Xanana Gusmão ba jornalista sira iha Palasiu Prezidensial, Nicolau Lobato, Bairo Pite, Dili, Kinta nee (10/04/2025) hatete, ohin enkontru semanal hodi informa ba Prezidente saida mak Governu halo no saida mak Governu la halo no tenta halo buat ruma, Konselhu Ministru horiseik la halo alterasaun, maibe halo aranje ba iha estatutu Majistradu Publiku, Ministeriu Publiku nian, tanba iha estrutura ninia iha fatin balu neebe too agora seidauk ense, neebe ohin informa ona ba Prezidente Republika.
“Informa mos ba Prezidente Republika foin daudaun nee enkontru ho Konselhu Superior Defeza no Seguransa husu atu sai, tanba ba partisipa Free Blance neebe ita mak sai uma nain, ema mai husi Afrika, mai husi ASEAN nia rasik, Laos, Mongolia, liu-liu kona-ba atu fo hatene malu oinsa osan Estadu nia bele lao ho diak para jere ho diak, nomos hau rekonhese katak fou-foun ita lao diak tebes, Free Blance mos akompanha hela, sira mos hakarak halo office ida, servisu fatin ida iha nee ita kontente,” dehan PM, Xanana.
Nia dehan, Timor Leste sorte ona hetan osan husi minarai, tanba iha rai balu osan laiha.
Iha biban nee Primeiru Ministru husu membru Governu nomos funsionariu publiku atu jere osan ho kuidadu, tanba nee osan povu nian.
“Problema barak iha rai barak-barak kiik kiak tanba laiha osan, husu fo netik oituan, tanba nee mak hau dehan ona katak kompromisu husi Governu, hotu-hotu neebe servisu ba estadu too funsionariu publiku atu jere osan didiak, tanba ita sorte ona iha osan, ita bele halo orsamentu lalika husu neeba no lalika tane liman tun sae, maibe tenke jere ho diak, lae hanesan akontese ona, ita koalia dala ruma gasta hotu, mais halo relatoriu mai dehan gasta hotu ona, ida mak importante tebes,” dehan PM, Xanana.
(eme)
