DILI, STLTIMORLESTE.com – Tama ASEAN laos katak buat hotu sai fasil, maibe iha dezafiu boot liu bainhira Timor Leste (TL) sai ona membru ASEAN.
Tuir Primeiru Ministru, Xanana Gusmão katak, ita tama ASEAN laos katak buat hotu sai fasil, ita tama ASEAN laos ita servisu la iha, ASEAN sei fo osan. No iha joven balu halo buat balu maibe sira remata SMP deit, maibe hatene hanoin tanba sa, bainhira ita atu hanoin ita nia hanoin nee tenke komprende prosesu nee tomak no lalaok atu ba neebe, hodi tuir.
“Tama iha ASEAN laos problema ida, atu ajuda ita rezolve problema hotu-hotu, ita sei iha dezafiu boot liu bainhira ita sai ona membru ASEAN,” dehan PM Xanana Gusmão iha nia intervensaun iha Palasiu Prezidente, Tersa, (02/09/2025).
PM sublina, husu universidade sira provoka diskusaun, buka ema atu kompriende, loke diskusaun atu konhese ASEAN no mundu tomak, atu ita nia hanoin nee bele funsiona ho diak, tanba iha funu laran aprende konhese o nia inimigu hanesan konhese o nia aan rasik, nia kbiit too iha neebe, fraku too iha neebe.
“Bolu atensaun ba jerasaun foun liu-liu foin sae sira atu konhese mundu, konhese mundu hanesan konhese o nia aan rasik, no iha mundu balu ukun aan kleur ona maibe buat balu seidauk lao loos, riku tebes la halo buat ida tanba Governu osan la iha, iha fatin balu riku tebes povu moris la diak tanba osan mina rai tama hotu sira nia kofre,” dehan Xanana.
PM Xanana dehan, joven sira tenke komprende, presiza diskusaun iha akademiku, husu joven sira atu konhese inimigu hanesan konhese o nia aan rasik, konhese sira nia kbiit iha neebe, sira nia fraku iha neebe, ho ita nia hanoin kona-ba saida mak bele kontribui ba rai ida nee.
Nia firma, kuandu haree buat sira nee no hatene hotu ona, ita iha ona kapasidade atu adapta aan ba prosesu neebe sei muda, prosesu dezenvolvimentu laos buat ida trasa ba deit, maibe aumenta ita nia kapasidade ita bele hatene no hatan ba prosesu nee rasik. Agora problema boot liu, tanba funu problema mak mate, maibe agora buka atu kapasita aan sai husi prosesu sira neebe sei lao lalos.
Iha fatin hanesan, Prezidente da Republika, Jose Ramos Horta dehan, buat neebe Timor fo ba iha ASEAN, ita nia hakarak dame.
“Ita tama ba ASEAN, dala ruma hau simu pergunta ruma mai husi liur, saida mak Timor Leste bele kontribui ba ASEAN, hau hatete ho umildade, hau la mehi barak, kontribuisaun ita bele halo, Timor nee fo ba ASEAN mak nee deit, ita hakarak dame iha rai laran,” dehan PR.
Jornalista: Terezinha De Deus
Editor: Xisto Mendonça
